Buxarestning “Dinamo” klubi jamoaga shartnoma imzolagan emas, balki boshqa futbolchi kelgan deya gumon qilmoqda.
Jurnalist Daniel Shendrening so‘zlariga ko‘ra, “Dinamo” klubiga Edgar Ie o‘rniga uning egizagi Edelino Ie borgan. Transfer qishda amalga oshirilgan, futbolchi oyiga 18 ming yevro maosh oladi.
Edgar “Barselona” tarbiyalanuvchisi hisoblanadi. Undan so‘ng “Lill”, “Nant”, “Trabzonspor” va “Feyenoord” kabi klublarda o‘ynagan. Uning egizak ukasi Edeleno esa faoliyatining katta qismini Portugaliya va Polshaning quyi ligalarida o‘tkazgan.
Fanatik xabar berishicha, Ruminiya klubi uzoq vaqtdan buyon futbolchi borasida gumonda bo‘lib kelmoqda. O‘yinchi hujjatlarni ko‘rsatishdan bosh tortgan va ingliz tilida muloqot qila olmagan. Biroq “Dinamo” Edgar bu tilda bemalol suhbatlashishiga ishonch hosil qilgan. Klub ixtiyoridagi futbolchi esa portugal tilida muloqot qiladi.
Qayd etilishicha, ikki oy avval Ie klub homiysidan mashina olmoqchi bo‘lgan. “Dinamo” bir necha hafta futbolchi bilan shartnomani bekor qilishga uringan, biroq u rozi bo‘lmagan.
Ruminiya klubi Iening shaxsini aniqlash uchun DNK testini o‘tkazmoqchi. Bundan tashqari, agar u Edgar emas, Edelino ekanligini tasdiqlansa, “Dinamo” Ie ishtirok etgan 5 o‘yin natijasi texnik mag‘lubiyatga almashtirilishi mumkin. Ushbu 5 o‘yinda “Dinamo” 8 ochko jamg‘arishga muvaffaq bo‘lgan.
“Biz Edgar Ie ishi bo‘yicha hech qanday izoh bermoqchi emasmiz. Barchasi oydinlashgach, bayonot beramiz”, — deya vaziyatga izoh bergan Ruminiya Professional Futbol Ligasi.
Izoh (0)