Бухарестнинг “Динамо” клуби жамоага шартнома имзолаган эмас, балки бошқа футболчи келган дея гумон қилмоқда.
Журналист Даниэль Шендренинг сўзларига кўра, “Динамо” клубига Эдгар Иэ ўрнига унинг эгизаги Эделино Иэ борган. Трансфер қишда амалга оширилган, футболчи ойига 18 минг евро маош олади.
Эдгар “Барселона” тарбияланувчиси ҳисобланади. Ундан сўнг “Лилль”, “Нант”, “Трабзонспор” ва “Фейеноорд” каби клубларда ўйнаган. Унинг эгизак укаси Эделено эса фаолиятининг катта қисмини Португалия ва Польшанинг қуйи лигаларида ўтказган.
Fanatik хабар беришича, Руминия клуби узоқ вақтдан буён футболчи борасида гумонда бўлиб келмоқда. Ўйинчи ҳужжатларни кўрсатишдан бош тортган ва инглиз тилида мулоқот қила олмаган. Бироқ “Динамо” Эдгар бу тилда бемалол суҳбатлашишига ишонч ҳосил қилган. Клуб ихтиёридаги футболчи эса португал тилида мулоқот қилади.
Қайд этилишича, икки ой аввал Иэ клуб ҳомийсидан машина олмоқчи бўлган. “Динамо” бир неча ҳафта футболчи билан шартномани бекор қилишга уринган, бироқ у рози бўлмаган.
Руминия клуби Иэнинг шахсини аниқлаш учун ДНК тестини ўтказмоқчи. Бундан ташқари, агар у Эдгар эмас, Эделино эканлигини тасдиқланса, “Динамо” Иэ иштирок этган 5 ўйин натижаси техник мағлубиятга алмаштирилиши мумкин. Ушбу 5 ўйинда “Динамо” 8 очко жамғаришга муваффақ бўлган.
“Биз Эдгар Иэ иши бўйича ҳеч қандай изоҳ бермоқчи эмасмиз. Барчаси ойдинлашгач, баёнот берамиз”, — дея вазиятга изоҳ берган Руминия Профессионал Футбол Лигаси.
Изоҳ (0)