Turkiya qurolli kuchlari 10-may kuni Suriya va Iroq shimolida Kurdiston ishchi partiyasiga aloqador 17 nafar jangarini yo‘q qildi. Bu haqda Anadolu nashri xabar berdi.
Holat haqida dastlab Turkiya Milliy mudofaa vazirligi xabar bergan. Turkiya kuchlari faol harakat qilib, jangarilarni yo‘q qilgani maʼlum qilingan.
Aksilterror amaliyot Iroqning Hakurk va Gara mintaqalarida amalga oshirilgan. “Zaytun novdasi” va “Tinchlik bulog‘i” harbiy amaliyot zonalariga kirib kelgan 7 jangari yo‘q qilingan. Suriya shimolida ham 10 nafar jangari zararsizlantirilgan.
Rasmiylar yo‘q qilinganlar bevosita Kurdiston ishchi partiyasiga aloqador bo‘lganini maʼlum qilgan. Ular Suriya va Iroq shimolidagi Turkiya harbiy inshootlariga va askarlar to‘planish nuqtalariga hujum uyushtirishni rejalashtirgani maʼlum qilingan.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)