Polshada portlamay qolgan bombalar sabab 2 mingga yaqin aholi evakuatsiya qilinadi

Polshaning Pomeraniya voyevodaligidagi (viloyati) yonilg‘i quyish shoxobchasi yonidan Ikkinchi jahon urushi davridagi aviabombalar topildi. Oqibatda hukumat ikki mingga yaqin odamni evakuatsiya qilmoqda. Bu haqda RMF xabar berdi.

Sapyorlar quruqlikdagi aviabombalarning aniq sonini bilish maqsadida bir nechta tekshiruvlar o‘tkazgan. Qazish ishlari olib borilgan hudud politsiya xodimlari tomonidan qo‘riqlangan. Sapyorlar bombani zararsizlantirishni rejalashtirgan.

Shu sababli Demboguj va Kazimija aholisini evakuatsiya qilish rejalashtirilmoqda. Sapyorlar o‘q-dorilarni portlatishga ikki soat vaqt sarflanishini aytgan, shundan so‘ng mahalliy aholi o‘z uylariga qaytishi mumkin.

Keng ko‘lamli evakuatsiyaga bomba yonilg‘i quyish shoxobchasi yaqinida joylashgani sabab bo‘lmoqda. Ikkinchi jahon urushi paytida portlamay qolgan snaryadlar vaqti-vaqti bilan janglar kechgan yoki bombardimon qilingan barcha mamlakatlarda topiladi.