Irlandiya Buyuk Britaniyadan kelayotgan noqonuniy muhojirlarning katta oqimiga to‘qnash kelmoqda. Bu haqda tegishli manbalarga tayanib, “TASS” xabar berdi.
Ma’lum bo‘lishicha, so‘nggi kunlarda Irlandiyadan boshpana so‘rab murojaat qilganlarning 80 foizi Buyuk Britaniyadan Shimoliy Irlandiyaning qo‘riqlanmagan chegarasi orqali mamlakatga kirgan.
Men hech qachon boshqa davlatning migratsiya siyosati mamlakatimiz barqarorligiga taʼsir ko‘rsatishiga yo‘l qo‘ymayman. Bizning mamlakatimiz hech qachon va hech qanday shaklda boshqalarning migratsiya muammolarini hal qilish uchun tuynuk bo‘lmagan, — dedi Irlandiya bosh vaziri Saymon Harris.
29-aprel kuni Irlandiya adliya vaziri Helen Makenti britaniyalik IIV rahbari Jeyms Kleverli bilan mavjud vaziyatni muhokama qilish niyatida. Irlandiya Vazirlar Mahkamasi noqonuniy muhojirlarning Buyuk Britaniyaga qaytishini osonlashtiradigan qonun loyihasini ham kiritmoqchi.
Britaniya hukumatining noqonuniy muhojirlarni Ruandaga jo‘natishni ko‘zda tutgan rejasi ikki yil avval Boris Jonson kabineti tomonidan taqdim etilgan. Hozirgacha bu amalga oshirilmagan, sababi Britaniya sudlari Ruandaga deportatsiya qilingan migrantlar hayoti va salomatligi xavf ostiga qo‘yilishi mumkin, deb hisoblagan. Shuningdek, Yevropa inson huquqlari bo‘yicha sud ham bunga qarshi chiqqan.
Vaziyatni hal qilish uchun Rishi Sunak hukumati Ruanda bilan bu imkoniyatni yo‘q qilish uchun yangi shartnoma imzolagan va Ruandani xavfsiz mamlakat deb e’lon qiladigan hamda chiqarib yuborilganlarning sudda e’tirozini cheklovchi yangi qonun qabul qilgan. London va Kigali o‘rtasidagi kelishuvga ko‘ra, qirollikdan chiqarib yuborilgan noqonuniy muhojirlar Ruanda yoki boshqa xavfsiz uchinchi davlatlardan boshpana so‘rashi mumkin.
Izoh (0)