Rossiya G‘arbda muzlatib qo‘yilgan aktivlar evaziga bosib olingan yangi hududlarni qaytarmaydi. Bu haqda Rossiya TIV matbuot kotibi Mariya Zaxarova o‘zining Telegram kanalida xabar qildi.
Hududdagi aktivlar o‘zgarmaydi. Biz vatanimiz ustidan savdolashmaymiz, — deya ta’kidlagan Zaxarova.
Uning qo‘shimcha qilishicha, Rossiya aktivlari daxlsiz bo‘lib qolishi kerak.
The Wall Street Journal avvalroq Germaniya Rossiya aktivlari musodara qilinishini qo‘llab-quvvatlashdan bosh tortayotgani haqida xabar bergan edi. Unga ko‘ra, Germaniya rasmiylari ushbu aktivlardan Ukrainadagi mojaroga barham berish va Rossiyaning hududiy imtiyozlari bo‘yicha muzokaralarda vosita sifatida foydalanish mumkin, deb hisoblaydi.
WSJ’ga ko‘ra, Berlin Rossiya aktivlarining musodara qilinishi Germaniyaga qarshi Ikkinchi jahon urushi davridagi jinoyatlar uchun yangi sud jarayonlarini qo‘zg‘atishi mumkinligidan xavotirda. Germaniya 1952-yildan beri Xolokost qurbonlari va ularning oilalariga 90 milliard dollardan ortiq pul to‘lagan.
Ekspertlar Germaniya mamlakatda faoliyatini davom ettirayotgan nemis kompaniyalarini himoya qilish uchun Rossiya aktivlarini musodara qilishdan bosh tortayotganini taxmin qilgan. Hozirda Rossiyada 272 nemis kompaniyasi mavjud.
Avvalroq Rossiya prezidenti matbuot kotibi Dmitriy Peskov Rossiya aktivlarining musodara qilinishi javob choralari va sud jarayonlarini keltirib chiqarishidan ogohlantirgan.
Izoh (0)