Majburiy ijro byurosining Andijon shahar bo‘limiga 2024-yilning birinchi choragida jismoniy va yuridik shaxslardan jami 806 ta murojaat kelib tushdi. Bu haqda O‘zA xabar berdi.
Qayd etilishicha, kelib tushgan murojaatlarning 675 tasi belgilangan tartiblar asosida ko‘rib chiqilgan. Ularning 263 tasi qanoatlantirilgan bo‘lsa, 462 tasiga huquqiy tushuntirishlar berilgan.
Jismoniy va yuridik shaxslardan kelib tushgan murojaatlar sohalar bo‘yicha tahlil etilganida, ularning 282 tasi aliment, 363 tasi qarz va zararni undirish, 2 tasi noqonuniy qurilmani buzdirish, 9 tasi xorijga chiqish huquqlarini vaqtincha cheklashni bekor qilish va 61 tasi boshqa masalalarni tashkil etgan.
Murojaatlarni ko‘rib chiqish jarayonida 213 nafar fuqaroning buzilgan huquqlari tiklanib, ularning foydasiga 2,4 milliard so‘m miqdorida mablag‘ undirib berilgan.
Mart o‘rtalarida Toshkent shahrining Shayxontohur tumanida MIB aliment to‘lamayotgan fuqarodan farzandiga 106,7 mln so‘m undirib bergandi.
Izoh (0)