Biznes-ombudsmanga 26-yanvar kuni “D.T.B.S.” (nomi o‘zgartirilgan) MCHJ rahbarining MIB Chilonzor tuman bo‘limi xodimlarining harakatsizligi ustidan shikoyat arizasi kelib tushgan. Bu haqda Biznes-ombudsman matbuot xizmati xabar berdi.
Maʼlum qilinishicha, jamiyat va qarzdor tashkilot o‘rtasida pudrat shartnomasi tuzilgan. Shartnoma shartlari jamiyat tomonidan o‘z vaqtida bajarilgan bo‘lib, bajarilgan ishlar uchun shartnomada qayd etilgan to‘lovlar amalga oshirilmagani sababli jamiyat qarzdor “Hududgaz taʼminot” AJni iqtisodiy sudga bergan.
Termiz tumanlararo iqtisodiy sudining qaroriga ko‘ra, jamiyat foydasiga qarzdor “Hududgaz taʼminot” AJdan 50,4 mln so‘m asosiy qarz va 10 mln so‘m penya undirish belgilangan. 2023-yil 10-iyulda ijro varaqasi asosida ijro ishi qo‘zg‘atilgan bo‘lsa-da, oradan qariyb yarim yil vaqt o‘tishiga qaramay, shu kunga qadar ijrosi taʼminlanmasdan kelgan.
“Vaholanki, ‘Sud hujjatlari va boshqa organlar hujjatlarini ijro etish to‘g‘risida’gi qonunning 23-moddasiga asosan, davlat ijrochisi ijro hujjatini olgan paytdan eʼtiboran bir ish kuni ichida ijro ishi yuritishni qo‘zg‘atish to‘g‘risida qaror chiqaradi. Shuningdek, ushbu qonunning 30-moddasiga ko‘ra, ijro harakatlari va ijro hujjatining talablari ijro hujjatining ixtiyoriy ijro etilishi uchun belgilangan muddat tugagan kundan eʼtiboran ko‘pi bilan ikki oy muddat ichida sud ijrochisi tomonidan amalga oshirilishi va ijro etilishi kerak. Ammo tegishli sonli ijro varaqasi bugungi kunga qadar ijro etilmasdan kelgan”, — deyiladi xabarda.
Qayd etilishicha, vakil devoni xodimlarining qonuniy talablaridan so‘ng MIB tomonidan jamiyatga qarzdor tashkilotdan qarzdorlik to‘liq undirilishi taʼminlangan.
Izoh (0)