Qashqadaryoda traktori noqonuniy olib qo‘yilgan fermerga 355 mln so‘m kompensatsiya undirib berilishi belgilandi. Bu haqda Biznes-ombudsman matbuot xizmati xabar berdi.
Maʼlum qilinishicha, tadbirkorlik subyektlarining huquqlari va qonuniy manfaatlarini himoya qilish bo‘yicha vakil devonining Qashqadaryo viloyatidagi sho‘basi tomonidan Nishon tumanida faoliyat yurituvchi “Samandar nur” fermer xo‘jaligi rahbari A.Boltayevning murojaati o‘rganilgan. Aniqlanishicha, MIB Nishon tumani bo‘limi tomonidan “Samandar nur” fermer xo‘jaligidan jami 35 mln so‘m qarzdorlikni undirishga oid 2022-yil 1-fevraldan 23-oktyabrgacha 5 ta ijro ishi qo‘zg‘atish to‘g‘risida qarorlar qabul qilingan.
Biroq davlat ijrochilari tomonidan qarzdor ijro ishi qo‘zg‘atilgani to‘g‘risidagi qarorlar bilan tanishtirilmagan holda, garovda turgan haydov traktori xatlanib, fermer xo‘jaligining dalasidan oldindan ogohlantirilmasdan auksionda sotish uchun olib ketilgan. Fermer qarzdorlik noto‘g‘ri hisoblanganini, oldindan bu haqda ogohlantirilganda, masalaga oydinlik kiritib, qarzini to‘lagan bo‘lishini bir necha bor taʼkidlashiga qaramasdan davlat ijrochilari bularni eʼtiborsiz qoldirgan.
Bundan tashqari, 35 mln so‘mlik qarzdorlik uchun undiruv nomutanosib miqdordagi mulkka, yaʼni 977,5 mln so‘m kredit mablag‘i evaziga sotib olingan traktorga qaratilib, olib ketilgan.
Murojaatda qayd etilgan holatlar bo‘yicha davlat ijrochilarining harakatlarida qonun buzilishlari mavjudligi sababli biznes-ombudsman tomonidan MIBga qonunchilikning aniqlangan buzilishlarini, ularga imkon beruvchi sabablar va shart-sharoitlarni bartaraf etish to‘g‘risida taqdimnoma kiritilgan. Shuningdek, fermer xo‘jaligining manfaatida Qarshi tumanlararo maʼmuriy sudiga davlat ijrochilarining xatti-harakatlarini qonunga xilof deb topish hamda traktorni chiqarib berish majburiyatini yuklash haqida kiritilgan ariza ko‘rilishida vakil devoni xodimlari qatnashib, fermerning huquqlari himoya qilinishi natijasida ariza qanoatlantirildi.
Natijada 2022-yil 7-dekabrda traktor xatlovdan chiqarilib, A.Boltayevga topshirildi va uning buzilgan huquqlari qisman tiklandi. Biroq traktor noqonuniy ushlab turilgan 49 kun davomida yetkazilgan zarar masalasi ochiq qoldirildi. Shundan so‘ng fermer xo‘jaligi manfaatida javobgar MIB Nishon tumani bo‘limidan 355 mln so‘m boy berilgan foyda-zararni undirish to‘g‘risida Qarshi tumanlararo iqtisodiy sudiga daʼvo arizasi kiritildi.
Sudning 2023-yil 7-apreldagi qarori bilan daʼvo asossiz rad etildi. Mazkur sud qaroriga nisbatan berilgan apellyatsiya shikoyati ham 2023-yil 3-avgustda Qashqadaryo viloyati sudi tomonidan qanoatlantirilmasdan qoldirildi. Shundan so‘ng fermer Oliy sudga murojaat qildi. Oliy sud kassatsiya instansiyasining 2023-yil 30-noyabrdagi qarori bilan fermer xo‘jaligi manfaatida berilgan kassatsiya shikoyati qisman qanoatlantirilib, quyi sudlarning asossiz qarorlari bekor qilindi va ish yangidan birinchi instansiya sudida ko‘rish uchun Qarshi tumanlararo iqtisodiy sudiga yuborildi. Fermer vakil devoni xodimlari bilan birgalikda sud majlislarida ishtirok qilib, daʼvo talablari asosli ekanligini isbotlab berdi.
Yaʼni traktor noqonuniy ushlab turilgan 49 kun (har bir kunga 7 mln 260 ming so‘m boy berilgan foyda) uchun jami 355 mln so‘m zarar yetkazilgani tuzilgan shartnoma va boshqa dalillar bilan to‘liq isbotlandi. Bugun, 5-fevral kuni Qarshi tumanlararo iqtisodiy sudi tomonidan ish ko‘rilib, fermer foydasiga Majburiy ijro byurosi Nishon tumani bo‘limidan 355 mln so‘m undirish to‘g‘risida qaror chiqarildi.
Izoh (0)