Moskvaning Basmanniy tuman sudi Crocus City Hall konsert zalida sodir etilgan terakt bo‘yicha o‘n birinchi ayblanuvchini 22-maygacha hibsga oldi. Bu haqda Deutsche Welle xabar berdi.
Gumonlanuvchi — Tojikiston fuqarosi Muhammad Zoir Sharipzoda ismli shaxs. U odam o‘limiga sabab bo‘lgan terakt sodir etganlikda ayblangan.
Terakt ishi bo‘yicha boshqa sud majlislaridan farqli o‘laroq, jurnalistlar bu haqda oldindan xabardor qilinmagan, — deb taʼkidlaydi Mediazona.
Jurnalistlarning da’volariga javoban sud matbuot xizmati o‘zlarining Telegram-kanalidagi to‘liq ma’lumotga ishora qilgan.
Sud ma’lumotlariga ko‘ra, tergov Sharipzodani Crocus’dagi teraktni tayyorlashda ishtirok etganlardan biri deb hisoblamoqda. Sud matbuot xizmati gumon qilinayotgan sheriklik aynan nimadan iborat bo‘lganiga aniqlik kiritmagan. Unga qo‘yilgan modda bo‘yicha eng ko‘p jazo umrbod qamoq jazosi bo‘lishi mumkin.
Moskva yaqinidagi Krasnogorskdagi Crocus City Hall binosiga hujum 22-mart kuni kechqurun sodir bo‘lgan edi. Qurollangan odamlar binoga bostirib kirib, odamlarga qarata o‘t ochgan, bir necha portlashlardan so‘ng, yong‘in boshlangan. So‘nggi ma’lumotlarga ko‘ra, terakt oqibatida 145 kishi halok bo‘lgan, 551 kishi jarohatlangan.
Sudlar allaqachon teraktga aloqadorlikda gumon qilingan o‘n kishi, jumladan, to‘rt nafari bevosita jinoyatchini hibsga olgan.
Izoh (0)