G‘azoda gumanitar xizmatchilarning halok bo‘lishi munosabati bilan 40 nafar amerikalik kongressmen AQSH prezidenti Jo Bayden va davlat kotibi Entoni Blinkenni Isroilni qurol bilan ta’minlashni to‘xtatishga chaqirdi.
Yordam xodimlariga qarshi yaqinda uyushtirilgan hujum va tobora kuchayib borayotgan gumanitar inqirozni hisobga olib, biz ushbu qurol-yarog‘ o‘tkazmalarini ma’qullashni asossiz deb hisoblaymiz. Sizni yana bir bor havo hujumi bo‘yicha tergov tugaguniga qadar har qanday hujumkor qurol o‘tkazishdan tiyilishga chaqiramiz, — deyiladi hujjatda.
Kongress a’zolari, shuningdek, Bayden va Blinkenni xalqaro qonunlarga mos keladigan shartlarga rioya qilish, agar Isroil G‘azoga gumanitar yordamni tashish va yetkazib berishni rad etsa yoki cheklasa, Isroilga jo‘natmalarni berishni to‘xtatishga chaqirmoqda.
World Central Kitchen notijorat tashkiloti 2-aprel kuni Isroilning G‘azoga uyushtirgan hujumida uning yetti nafar xodimi halok bo‘lganini, qurbonlar Avstraliya, Polsha, Britaniya, AQSH va Falastindan ekanini ma’lum qilgan edi. Bir qator davlatlar voqea yuzasidan tergov o‘tkazishni talab qilmoqda.
BMT bosh kotibining gumanitar masalalar bo‘yicha o‘rinbosari Martin Griffits Isroilning zarbasi natijasida nodavlat tashkilot xodimlarining o‘limini “dahshatli” deb atagan va hujum qasddan qilinganmi yoki yo‘q, bundan qat’i nazar jinoyat ekanligini ta’kidlagan.
Izoh (0)