Meksika prezidenti Andres Manuel Lopes Obrador tashqi ishlar vaziri Alisiya Barsenaga Ekvador bilan diplomatik munosabatlarni uzish haqida ko‘rsatma berdi. Bu haqda Meksika davlati rahbari 6-aprel kuni X ijtimoiy tarmog‘ida xabar qildi.
Ma’lum bo‘lishicha, mazkur qaror Ekvador politsiyasining 2023-yil dekabridan buyon Ekvador sobiq vitse-prezidenti Xorxe Glas istiqomat qilayotgan Kitodagi Meksika elchixonasiga majburan kiritilishi bilan bog‘liq. U Meksikadan siyosiy boshpana so‘ragan.
Holat yuzasidan Meksika tashqi ishlar vaziri Alisiya Barsena Mexiko shahri Ekvadorni xalqaro huquqni buzganlikda ayblab, Xalqaro sudga murojaat qilishini aytgan. TIV rahbari taʼkidlaganidek, elchixonaga bostirib kirish chog‘ida bir necha meksikalik diplomat jarohatlangan.
6-aprelga o‘tar kechasi Ekvador politsiyasi Kitodagi Meksika elchixonasiga kirib, u yerda Ekvador rasmiylaridan yashirinib yurgan mamlakat sobiq vitse-prezidenti Xorxe Glasni hibsga olgan. Glas vatanida poraxo‘rlik va korrupsiyada ayblanmoqda. U 2017-yildan 2022-yilgacha Ekvador qamoqxonasida bo‘lgan.
Meksika prezidenti Lopes Obrador mamlakat elchixonasiga bostirib kirishni “xalqaro huquq va suverenitetni qo‘pol ravishda buzish” deb atadi. Bundan oldin, Ekvador prezidentining idorasi Ekvador suveren davlat ekanligini ta’kidlab, Kito birorta jinoyatchining ozod bo‘lishiga yo‘l qo‘ymasligini aytgan edi.
Meksikaning Kitodagi elchixonasi binosidagi holatni kuzatgan ekspertlar ushbu harakatlar “Konsullik munosabatlari to‘g‘risidagi Vena konvensiyalarini qo‘pol ravishda buzish ekanligini va bu mamlakat hukumatlari o‘rtasida kuchli nizo keltirib chiqarishi mumkin”ligini taʼkidlagan.
Izoh (0)