Трамп фирибгарлик иши бўйича 175 миллион доллар гаров тўлади

АҚШнинг собиқ президенти Дональд Трамп Нью-Йоркдаги фирибгарлик иши бўйича 175 миллион доллар гаров пулини тўлади, дея BBC хабар берди.

Маълум бўлишича, шу тариқа у мол-мулкини мусодара бўлишидан қутулиб қолган. Аввалроқ Нью-Йорк суди Трампнинг гаров пулини 464 миллион доллар қилиб белгилаган, бироқ апелляция натижасида у сезиларли даражада камайтирилган эди.

Февраль ойида суд Трампни қасддан молиявий фирибгарликда айбдор деб топган. Қарорда айтилишича, собиқ президент банкларни чалғитиш ва кредит шартларини яхшилаш мақсадида ўн йил давомида ўз бойлигини ошириб кўрсатган.

Оқ уйга яна Республикачилар партиясидан номзодини қўйган Трамп барча айбловларни асоссиз деб ҳисоблаган. Трамп суд қарори устидан апелляция берган, у рад этилган тақдирда, собиқ президент 464 миллионни тўлиқ тўлаши керак бўлар эди.

Бунгача Трампнинг адвокатлари у солиқ тўлаш учун бундай миқдорни топа олмаслигини айтган. Агар Трамп 175 миллион доллар гаров пулини тўлай олмаганда, унинг барча мулклари, жумладан Манҳэттендаги Trump Тоwеr осмонўпар биноси ва Флоридадаги Мар-а-Лаго мулки мусодара қилиниши мумкин эди.

15 апрель куни Манҳэттенда унинг жиноий ишларидан бири бўйича биринчи суд мажлиси бошланиши режалаштирилган. Трамп Вашингтонда қўзғолон уюштиришга уриниш, Жоржиядаги президентлик сайловлари натижаларини бекор қилиш ва президентлик даврида махфий ҳужжатларни сақлаш қоидаларини бузганликда ҳам айбланмоқда.