AQSH sobiq prezidenti Donald Trampning advokatlari uning firibgarlik ishi bo‘yicha sud tomonidan qo‘yilgan jarimani qoplash uchun 550 million dollardan ortiq garov pulini to‘lay olmasligini aytdi, deya Euronews xabar berdi.
Tegishli bayonot 18-mart kuni Nyu-York sudida qabul qilingan. Unda aytilishicha, jarimani to‘lashning hozirda iloji yo‘q. Tramp jarima haqidagi qaror ustidan shikoyat qilmoqchi. Ammo sud apellyatsiyani ko‘rib chiqishi uchun Tramp ushbu jarimaning 120 foizi va kuniga 112 000 dollar miqdorida jarima to‘lashi lozim.
O‘tgan yili Tramp 400 million dollardan ortiq naqd puli borligini daʼvo qilgan edi. Sobiq rahbarning advokatlari 30 ta anderrayting firmasining (foizli kredit beruvchi kompaniyalar) rad javobiga ishora qilib, garov miqdorini yarim milliard dollardan 100 million dollargacha kamaytirishni so‘ragan.
Tramplarga qarshi firibgarlik ishi
Shu yilning fevral oyida Nyu-York sudyasi Artur Engoron prokuror Letitia Jeymsning Tramp va uning o‘g‘illari kichik Donald va Erik Trampga qarshi da’vosini qanoatlantirgan edi.
Tergov ular uzoq yillar davomida banklar va sug‘urtachilarni aldab kelishganini isbotlagan. Tramplar moliyaviy hisobotlarda o‘z boyliklarini sezilarli darajada oshirib ko‘rsatgan va shu tariqa kreditlar olib, o‘zlari uchun qulayroq shartlarda bitimlar tuzgan.
Sud Donald Trampga 355 million dollar jarima solgan. Shuningdek, unga uch yil davomida Nyu-York korporatsiyalari va korxonalarida lavozimlarni egallash va shtatdagi har qanday moliya institutidan kredit olish uchun ariza topshirish taqiqlangan. O‘g‘illari to‘rt million dollar jarimaga tortilgan.
Mulkni musodara qilish istiqbollari
Demokratik partiya aʼzosi Letitia Jeyms, agar Tramp kerakli miqdorda mablag‘ kiritmasa, u aktivlarining bir qismini tortib olishga harakat qilishini aytgan. Advokatlarning xabar berishicha, apellyatsiyani ko‘rib chiqish uchun talab qilinadigan garov miqdori allaqachon 557,5 million dollarni tashkil etadi.
Tramp milliard dollar boylikka ega ekanligini daʼvo qilishiga qaramay, uning aktivlari osmono‘par binolar, golf maydonlari va boshqa ko‘chmas mulklardir.
Anderrayterlar garov sifatida naqd pul va qimmatli qog‘ozlarni afzal ko‘rishadi, — deya qo‘shimcha qilgan advokatlar.
Izoh (0)