AQShning Parij va Jenevadagi diplomatik missiyalarining bir qancha xodimlari “Gavana sindromi” deb ataluvchi kasallik – quloqlarda shovqin, bosh og‘rig‘i va aylanishidan shikoyat qildi. Bu haqda The Wall Street Journal xabar berdi.
Nashr ma’lumotlariga ko‘ra, Jenevadagi diplomatik missiya xodimlaridan birini muolaja uchun AQShga olib ketishga to‘g‘ri kelgan, jami uch kishida “Gavana sindromi” qayd etilgan. Parijda esa bir nafar amerikalik diplomatda ushbu kasallik belgilari kuzatilgan, deb yozadi WSJ.
AQSh Davlat departamenti bu ma’lumotga rasmiy izoh bermagan.
2021-yilning avgustida Germaniyada ikki amerikalik amaldor o‘zida “Gavana sindromi” belgilari paydo bo‘lgach, tibbiy yordamga murojaat qilgandi. Bu NATO davlatlarida ushbu sindrom bo‘yicha qayd etilgan dastlabki holat edi.
Amerikalik diplomatlar orasida “Gavana sindromi”ning birinchi holatlari 2016-yilda Kubada qayd etilgan. O‘shandan beri shunga o‘xshash hodisalar O‘zbekiston, Xitoy, Rossiya va Avstriyadagi diplomatlarda aniqlandi, deb yozadi WSJ. Polsha, Gruziya, Tayvan va Vashingtonda ham ushbu sindrom bo‘yicha tasdiqlanmagan holatlar bo‘lgan.
AQSh razvedka agentliklari hujumlar ortida Rossiya hukumati turishi mumkin deb taxmin qilgan. Moskva voqealarga aloqasi borligini qat’iyan rad etadi.
Ma’lumot uchun, 2016-yildan beri dunyoning turli mamlakatlarida o‘nlab amerikalik davlat xizmatchilari duch kelgan va aniq tushuntirib berilmagan simptomlarni OAV “Gavana sindromi” deb ataydi. Bu simptomlardan Gavanadagi AQSh elchixonasi xodimlari birinchi marta shikoyat qilgan. Ular quloqlarda shovqin va og‘riq hamda bosh aylanishi haqida ma’lum qilgan.
Mavzuga doir:
- Germaniyadagi amerikalik amaldorlar “Gavana sindromi”dan shikoyat qildi. Avvalroq u AQShning O‘zbekiston, Rossiya va Xitoydagi diplomatlarida ham qayd etilgan
- “Miyam shunday ishlaydi”. Ilon Mask o‘zida Asperger sindromi borligini tan oldi
- AQShda bolalarning COVID-19 dan keyin xavfli sindromga chalinish holatlari ortdi
Izoh (0)