Andijonda bank sobiq rahbariga nisbatan jinoyat ishi qo‘zg‘atildi

Andijon viloyati prokuraturasi “Infinbank” Andijon filiali sobiq rahbariga nisbatan jinoyat ishi qo‘zg‘atilganini ma’lum qildi.

Ijtimoiy tarmoqqa joylashtirilgan fuqaro D.A.ning ATB “Infinbank” Andijon filialiga qo‘yilgan omonatini qaytarib olishni suddan talab qilsa-da, o‘zi Jinoyat kodeksining tegishli moddalari bilan ayblanib, ehtiyot chorasi sifatida “qamoqqa” olinganidan noroziligi haqida xabar tarqaldi.

Aniqlanishicha, ATB “Infinbank” Andijon filiali sobiq rahbari F.A. bank mijozlarining kredit va omonat hisob raqamlaridagi juda ko‘p miqdordagi pul mablag‘larini talon-toroj qilgani uchun unga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va boshqa moddalari bilan jinoyat ishi qo‘zg‘atilgan.

Jinoyat ishi bo‘yicha dastlab tergov harakatlari Andijon viloyati IIB huzuridagi Tergov bo‘limi tomonidan, keyinchalik IIV huzuridagi Tergov departamenti tomonidan olib borilib, fuqaro D.A. gumon qilinuvchi tariqasida qamoqqa olingan.

Hozirda mazkur jinoyat ishi bo‘yicha tergov harakatlari Tergov departamenti tomonidan davom ettirilmoqda.

Eslatib o‘tamiz, 2022-yilda “Xalq banki”ning Andijon viloyati Amaliyot bo‘limi xodimlari 4,6 milliard so‘mni o‘zlashtirgani aniqlangan edi.