O‘zbekistonda fiskal tartib-qoidalarini buzganlik uchun jarima miqdori kamaytirilgandi. Soliq kodeksiga tegishli o‘zgartirish kiritish to‘g‘risidagi qonun loyihasi qabul qilindi.
Oliy Majlis Qonunchilik palatasi majlisida “O‘zbekiston Respublikasi Soliq kodeksining 227-1-moddasiga o‘zgartirish kiritish to‘g‘risida”gi qonun loyihasi deputatlar tomonidan qabul qilindi va Senatga yuborildi.
Yangi tahrirdagi Konstitutsiyada jazolar mutanosibligi prinsipi aks ettirilishi munosabati bilan soliq qonunchiligini buzish bilan bog‘liq javobgarliklarni yanada liberallashtirish zaruriyati yuzaga kelganligi sababli qonun loyihasi bilan Soliq kodeksining 227-1-moddasi bo‘yicha jarima miqdori 50 baravarga kamaytirilmoqda.
Ya’ni, endilikda fiskal belgilarni aks ettirish yoxud avtomatlashtirilgan hisobga olish o‘lchov vositalari bilan jihozlash yoki soliq organlarining axborot tizimlari bilan integratsiya qilinishini ta’minlash bo‘yicha qonunchilikda belgilangan talablarni yoki tartibni buzish, shuningdek tovarlarni (mahsulotlarni) ishlab chiqaruvchilar, import qiluvchilar va sotuvchilar tomonidan identifikatsiya vositalari orqali majburiy raqamli markirovkalash tartib-qoidalariga oid huquqbuzarliklar birinchi marta sodir etilganda realizatsiya amalga oshirilgan oxirgi hisobot choragida olingan sof tushumning 2 foizi miqdorida jarima solishga sabab bo‘lishi belgilanmoqda.
“Tadbirkorlar u yoki bu sababli mahsulotni markirovkalamagan yoki do‘koniga avtomatlashtirilgan hisobga olish o‘lchov vositalarini o‘rnata olmaganda oxirgi hisobot choragida ega bo‘lgan sof tushumni jarima shaklida to‘lashga majbur bo‘layotgandi.
Qonun loyihasi bilan Soliq kodeksiga kiritilayotgan o‘zgartirishga ko‘ra, endilikda fiskal tartib-qoidalarga oid huquqbuzarliklar uchun qo‘llaniladigan moliyaviy jarima miqdori qariyb 98 foizga qisqartirilmoqda”, — deydi Qonunchilik palatasi spikeri o‘rinbosari Odiljon Tojiyev.
Xuddi shunday huquqbuzarlik moliyaviy jazo chorasi qo‘llanilganidan keyin bir yil davomida takror sodir etilgan bo‘lsa, realizatsiya amalga oshirilgan oxirgi hisobot choragida olingan sof tushumning 20 foizi miqdorida jarima solishga sabab bo‘ladi.
Muhokamalar davomida deputatlarning ta’kidlashicha, qonun loyihasining qabul qilinishi soliq qonunchiligini buzganlik uchun javobgarlikni yanada liberallashtirish, soliqqa oid huquqbuzarliklar uchun javobgarlik choralarini adolatlilik tamoyili asosida belgilanishiga, huquqbuzarliklarning barvaqt oldi olinishiga hamda tadbirkorlik subyektlariga ortiqcha xarajatlar yuklanmasligiga xizmat qiladi.
Izoh (0)