Farg‘onada “Agrobank” xodimlari omonatchilardan birining pullarini o‘zlashtirib yuborgani haqida xabarlar tarqaldi. Ijtimoiy tarmoqlarda tarqalgan xabarlar yuzasidan bank matbuot xizmati izoh berdi.
Ma’lum qilinishicha, bankning ichki audit xizmati tomonidan Farg‘ona filialida o‘tkazilgan audit tekshiruvlari davomida filial boshqaruvchisi lavozimida ishlab kelgan X.O. va boshqalar tomonidan bankka 600 million so‘m pul topshirgan omonatchining ushbu pullarini 2023-yil mart oyida boshqa maqsadlarda chiqim qilib, omonatchining plastik kartasiga o‘zlarining pullaridan bank orqali oyma-oy pul o‘tkazib kelgani, o‘zlariga ishonib topshirilgan pullarni o‘zlashtirib yuborgani aniqlangan.
Shuningdek, ichki audit xizmati tomonidan o‘tkazilgan tekshiruvda bankning sobiq mas’ul filial xodimlari tomonidan Fergana-Oseana mas’uliyati cheklangan jamiyat qo‘shma korxonasining 1,5 milliard so‘mi qalbaki hujjatlar asosida o‘zlashtirib yuborgani ham ma’lum bo‘lgan.
Bundan tashqari, tekshiruv davomida bankning sobiq mansabdor shaxslari tomonidan kunlik kassa hujjatlari ma’lumotlarini soxtalashtirish yo‘li bilan 1,8 milliard so‘mni o‘zlashtirilgani fosh etilgan.
Tegishli hujjatlar asosida bankning Farg‘ona filiali sobiq mansabdor shaxslariga jinoyat ishi qo‘zg‘atilgan va aybdorlarga 2023-yilning dekabrida Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a, g” bandi va boshqa moddalari bilan tegishli jazolar tayinlangan va yetkazilgan zararlar aybdorlardan undirilgan.
Izoh (0)