Toshkent viloyatining Piskent tumanida MCHJ rahbari va sobiq bank boshqaruvchisi 9 mlrd so‘m kreditni o‘zlashtirgani aniqlandi. Bu haqda Bosh prokuratura departamenti xabar qildi.
Ma’lum qilinishicha, “Mikrokreditbank” ATB Piskent filialining murojaatiga asosan departamentning Piskent tuman bo‘limi tomonidan tergovga qadar tekshiruv o‘tkazilgan.
Tekshiruv natijasida “Kh.S.” va “A-B.” MCHJlar rahbari N.S. va boshqalar ushbu bank filiali sobiq boshqaruvchisi R.M. bilan o‘zaro til biriktirib, boshqa bank filialida garovga qo‘yilgan mulklarni qalbaki hujjatlar asosida takroran garovga qo‘yish orqali tadbirkorlik va chorvachilik faoliyatini rivojlantirish uchun jami 9 mlrd so‘m kredit ajratilishiga erishib, mazkur mablag‘larni “P.” MCHJga o‘tkazish orqali naqdlashtirib olib, talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 205-moddasi (hokimiyat yoki mansab vakolatini suiisteʼmol qilish) 28, 209-moddasi (mansab soxtakorligi) va 233-moddasi (band solingan mulkni qonunga xilof ravishda tasarruf etish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)