“Xalq banki”ning Andijon viloyati Amaliyot bo‘limi xodimlari 4,6 mlrd so‘mni o‘zlashtirgani aniqlandi

“Xalq banki”ining 4,6 milliard puli o‘zlashtirilgani haqidagi ma’lumot “Muxbir Daliyev” Telegram-kanalida e’lon qilindi. Xabarda 10-fevral kuni Xalq bankining 10 dan ortiq mansabdorlari qamoqqa olingani aytilgan.

Mazkur holatni aniqlashtirish maqsadida “Daryo” “Xalq banki” axborot xizmati rahbari Gulnoza Alimova bilan bog‘landi. Bank vakilining ma’lum qilishicha, bu haqda Bosh prokuratura o‘z sahifalarida rasmiy axborot bermagan.

“Shu sabab hozirda ijtimoiy tarmoqlarda tarqalayotgan xabar mish-mish hisoblanadi. Qachonki axborot Bosh prokuratura rasmiy sahifalarida berilganidan so‘nggina biz ham xabar beramiz”, – dedi Gulnoza Alimova.

Ta’kidlanishicha, Bosh prokuratura tomonidan AT “Xalq banki” Andijon viloyati Amaliyot bo‘limi xodimlari va boshqalarga nisbatan qo‘zg‘atilgan jinoyat ishi yuzasidan tergov harakatlari olib borilmoqda.

Tergov davomida bank xodimlari 4,6 milliard so‘mni o‘zlashtirganliklari aniqlangan.

Ushbu kamomadga yo‘l qo‘ygan 13 nafar bank xodimlariga Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yo‘li bilan talon-toroj qilish) bilan ayb e’lon qilingan. 11 nafariga qamoq, 2 nafariga garov ehtiyot choralari qo‘llanilgan.

Tergov harakatlari olib borilmoqda.

Bundan avval Surxondaryoda fermer xo‘jaligi rahbari 900 mln so‘m kredit mablag‘ini o‘zlashtirgani aniqlangani, Farg‘onada bankning mobil ilovasidagi texnik xatolikdan foydalanib, qariyb 700 mln so‘m pulni o‘g‘irlagan shaxslar ushlangani hamda Buxoro viloyati Xalq ta’limi boshqarmasi o‘quvchilardan 914,4 mln so‘mni noqonuniy yig‘moqchi bo‘lgani aniqlangani haqida xabar berilgandi.