Андижон вилояти прокуратураси “Инфинбанк” Андижон филиали собиқ раҳбарига нисбатан жиноят иши қўзғатилганини маълум қилди.
Ижтимоий тармоққа жойлаштирилган фуқаро Д.А.нинг АТБ “Инфинбанк” Андижон филиалига қўйилган омонатини қайтариб олишни суддан талаб қилса-да, ўзи Жиноят кодексининг тегишли моддалари билан айбланиб, эҳтиёт чораси сифатида “қамоққа” олинганидан норозилиги ҳақида хабар тарқалди.
Аниқланишича, АТБ “Инфинбанк” Андижон филиали собиқ раҳбари Ф.А. банк мижозларининг кредит ва омонат ҳисоб рақамларидаги жуда кўп миқдордаги пул маблағларини талон-торож қилгани учун унга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” банди ва бошқа моддалари билан жиноят иши қўзғатилган.
Жиноят иши бўйича дастлаб тергов ҳаракатлари Андижон вилояти ИИБ ҳузуридаги Тергов бўлими томонидан, кейинчалик ИИВ ҳузуридаги Тергов департаменти томонидан олиб борилиб, фуқаро Д.А. гумон қилинувчи тариқасида қамоққа олинган.
Ҳозирда мазкур жиноят иши бўйича тергов ҳаракатлари Тергов департаменти томонидан давом эттирилмоқда.
Эслатиб ўтамиз, 2022 йилда “Халқ банки”нинг Андижон вилояти Амалиёт бўлими ходимлари 4,6 миллиард сўмни ўзлаштиргани аниқланган эди.
Изоҳ (0)