Buyuk Britaniyaning London shahrida O‘zbekiston savdo uyi ochilishi kutilmoqda. Bu haqda Savdo-sanoat palatasi xabar berdi.
Unga ko‘ra, savdo-sanoat palatasi raisi o‘rinbosari Umidbek Safarov O‘zbekistonning Buyuk Britaniyadagi elchisi Ravshan Usmonov bilan uchrashdi. Elchi o‘zbekistonlik mehmonlarni tashrif bilan qutlab, tomonlar IFE 2024 oziq-ovqat va ichimliklar xalqaro ko‘rgazmasi yakunlari bo‘yicha fikrlar bilan o‘rtoqlashdi.
Uchrashuv davomida tomonlar ikki mamlakat o‘rtasidagi savdo-iqtisodiy, investitsiyaviy va boshqa sohalardagi hamkorlikning bugungi holati va uni yanada rivojlantirish istiqbollari, jumladan, hududlararo hamkorlikni rivojlantirish, bu orqali mahalliy ishlab chiqaruvchilar o‘rtasida to‘g‘ridan to‘g‘ri hamkorlik aloqalarini yo‘lga qo‘yish masalalari ko‘rib chiqildi.
Londonda O‘zbekiston savdo uyini tashkil etish imkoniyatlariga eʼtibor qaratildi. Bundan ko‘zlangan maqsad Buyuk Britaniya bilan ishbilarmonlik va iqtisodiy aloqalarni ko‘paytirish va mustahkamlash, shu bilan birga, tadbirkorlar uchun yangi biznes imkoniyatlarini ochish. Uchrashuv yakunida joriy yil davomida tomonlar tarafidan hamkorlik borasida amalga oshiriladigan ishlar bo‘yicha kelishib olindi.
Izoh (0)