Andijondagi dorixonada ro‘yxatdan o‘tmagan 66 turdagi dori vositalari sotish uchun saqlab kelingani aniqlandi

Andijondagi dorixonada davlat ro‘yxatidan o‘tmagan 66 turdagi dori vositalari sotish uchun saqlab kelingani aniqlandi. Bu haqda Bosh prokuratura huzuridagi departament xabar berdi.

Ma’lum qilinishicha, Andijon shahrida faoliyat yurituvchi “K-B.” MCHJga qarashli dorixonada muvofiqlik sertifikati bo‘lmagan 87 turdagi hamda davlat ro‘yxatidan o‘tmagan 66 turdagi umumiy bahosi 310 million so‘mlik 19 350 dona dori vositalari sotish uchun saqlab kelingan.

O‘tkazilgan tezkor tadbirda ushbu dori vositalari ashyoviy dalil sifatida olingan.

Departamentning Namangan viloyat boshqarmasi tomonidan IIB xodimlari bilan hamkorlikda o‘tkazilgan tezkor tadbirda “G.Ph.” MCHJning Namangan shahridagi dorixonasi mudiri G.X. fuqaro A.S.ga 40 dona kuchli ta’sir qiluvchi dori vositasini shifokor retseptisiz 645 ming so‘mga sotgan vaqtida ushlanib, ushbu dorixonadan sotish uchun saqlab qo‘yilgan 4 turdagi jami 204 dona kuchli ta’sir qiluvchi dori vositalari ashyoviy dalil sifatida olingan.

Shu kabi, departamentning Norin tumani bo‘limi tomonidan o‘tkazilgan tezkor tadbirda “B.S.” MCHJ dorixonasi sotuvchisi G.A. fuqaro M.X.ga 63 dona “Gabaten” nomli kuchli ta’sir qiluvchi dori vositasini shifokor retseptisiz 252 ming so‘mga sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.