Yanvar–fevral oylarida O‘zbekistonning Markaziy Osiyo mamlakatlari bilan savdo aylanmasidagi eng katta ulushi Qozog‘iston hissasiga to‘g‘ri keldi – 59 foiz. Shuningdek, Turkmaniston – 19 foiz, Tojikiston – 12 foiz va Qirg‘iziston – 10 foizni tashkil etdi.
Iqtisodiy tadqiqotlar va islohotlar markazi 2024-yil yanvar–fevral oylarida O‘zbekistonning Markaziy Osiyo mamlakatlari bilan tashqi savdo hajmi 982,9 million dollarga yetganini maʼlum qildi. Bu umumiy eksport–import hajmining 9,9 foiziga teng. 2023-yilning mos davrida respublikaning Markaziy Osiyo davlatlari bilan jami savdosi 976,8 million dollarni tashkil etgan.
O‘tgan ikki oy davomida O‘zbekiston qo‘shni mamlakatlar bilan 320,1 million dollarlik eksport, 662,8 million dollarlik importni amalga oshirdi.
Xususan, O‘zbekistonning Qozog‘iston bilan umumiy tovar ayirboshlash hajmi 581,5 million dollarga teng bo‘ldi. Shundan 166,2 million dollari eksport, 415,3 million dollari import. 2023-yilning mos davrida esa O‘zbekiston–Qozig‘iston savdo aylanmasi hajmi 700,2 million dollar bo‘lgan. Yaʼni bu yilgi savdo ulushi sezilarli qisqardi.
Statistika agentligi maʼlumotlariga ko‘ra, o‘tgan ikki oy mobaynida O‘zbekistonning Turkmaniston bilan savdo aylanmasi hajmi 184,6 million dollarni tashkil etgan. O‘tgan yilning mos davrida bu raqam 59,8 million dollar bo‘lgan. Joriy yanvar va fevral oylarida Turkmaniston bilan 11,1 million dollarlik eksport, 173,5 million dollarlik import operatsiyalari amalga oshirilgan.
Ikki oy ichida O‘zbekiston va Tojikiston o‘rtasida 118,5 million dollarlik mahsulotlar eksport–import qilindi. Shundan eksport ulushi 79,4 million dollarni, import esa 39,1 million dollarni tashkil etdi. 2023-yil yanvar–fevral oylarida O‘zbekiston–Tojikiston tashqi savdo aylanmasi hajmi 86,3 million dollar bo‘lgan.
Yanvar–fevral oylarida O‘zbekistonning Qirg‘iziston bilan tashqi savdo aylanmasi 98,3 million dollarga pasaydi. Bunda eksport ulushi 63,4 million dollar, import 34,9 million dollar bo‘lgan. 2023-yilning mos davrida Qirg‘iziston bilan savdo aylanmasi hajmi 168,3 million dollarni tashkil etgandi.
Bugungi kunda O‘zbekiston jahonning 151 mamlakati bilan savdo aloqalarini amalga oshirib kelmoqda. Tashqi savdo aylanmasining nisbatan salmoqli hissasiga to‘g‘ri keladigan hamkorlar orasida Markaziy Osiy mintaqasida faqatgina Qozog‘iston (jami ulushi 5,9 foiz) mavjud.
Eslatib o‘tamiz, o‘tgan ikki oyda O‘zbekiston eksporti tarkibida tovarlar ulushi 81,5 foizni tashkil etdi. Ular sanoat tovarlari (36,4 foiz), oziq-ovqat mahsulotlari va tirik hayvonlar (16,8 foiz), kimyoviy vositalar va shunga o‘xshash mahsulotlar (6,6 foiz) hissasiga to‘g‘ri kelmoqda.
Import tarkibida eng katta ulush mashinalar va transport asbob-uskunalari (38,9 foiz), sanoat tovarlari (18 foiz) hamda kimyoviy vositalar va shunga o‘xshash mahsulotlar (11,8 foiz) hisobiga to‘g‘ri keldi.
Izoh (0)