Toshkentda huquq-tartibot idoralari xodimlari fuqarolar xavfsizligini taʼminlash maqsadida nazoratni kuchaytirdi. Bu haqda poytaxt IIBB matbuot xizmati xabar berdi.
Fuqarolar xavfsizligini taʼminlash maqsadida Toshkent shahar IIBB xodimlari savdo majmualari, ko‘ngilochar maskanlar, bozorlar va boshqa jamoat joylarida kuchaytirilgan tartibda xizmat olib bormoqda.
Boshqarma tomonidan ilova qilingan suratlarda tezkor vazifalarni bajaruvchi safarbarlik otryadlari ham jalb qilinganini ko‘rish mumkin.
“Mamlakatimiz, shahrimiz va har bir mahallada tinchlik va osoyishtalikni yanada mustahkamlash uchun barchamiz birdek masʼulmiz. Befarq bo‘lmang”, — deyiladi xabarda.
IIV matbuot xizmatining ma’lum qilishicha, O‘zbekistonning barcha hududlaridagi madaniy ko‘ngilochar maskanlar, yirik savdo markazlari va dehqon bozorlari, xiyobonlar, sport inshootlari hamda boshqa jamoat joylarida inson xavfsizligini taʼminlashga qaratilgan barcha vazifalar bekamu-ko‘st bajarilmoqda.
Vazirlik jamoat joylarida xizmat vazifasini bajarib, jamoat xavfsizligini taʼminlayotgan huquq posbonlarining qonuniy talablarini eʼtirozsiz bajarish zarurligini bildirib, turli manzillarda qarovsiz qoldirilgan har qanday buyumni eʼtibordan chetda qoldirmasdan, ular haqda darhol 102 raqamiga xabar berish lozimligini eslatdi.
Izoh (0)