Ko‘p qavatli xonadonlarda aholini chiqindini saralagan holda shoxobchaga olib borishga rag‘batlantiradigan tizim joriy etiladi. Bu haqda Shavkat Mirziyoyev 29-mart kuni o‘tkazilgan videoselektor yig‘ilishida ta’kidladi.
Bunda Ekologiya jamg‘armasi hisobidan aholiga maxsus chiqindi paketlari bepul beriladi, aholi chiqindini qayta ishlanadigan, qayta ishlanmaydigan va organik toifaga ajratib, shoxobchaga olib boradi. Tadbirkor esa qayta ishlanadigan foydali chiqindini aholidan sotib oladi.
Ushbu tizim dastlabki bosqichda Toshkent, Andijon, Buxoro, Termiz, Angren shaharlari va Toshkent tumanida yo‘lga qo‘yilishi belgilandi.
Ushbu hududlardagi ko‘p qavatli uylar yaqinidagi chiqindi yig‘ish maydonlarida “qayta ishlanadigan” toifaga mansub chiqindi turlari sotib olish yo‘li bilan qabul qilinishi haqida “Chiqindilarni boshqarish tizimini takomillashtirish va ularning ekologik vaziyatga salbiy ta’sirini kamaytirish bo‘yicha chora-tadbirlar to‘g‘risida”gi farmonida ko‘zda tutilgandi.
Hujjatga ko‘ra, qattiq maishiy chiqindilarni saralash tizimini boshqichma-bosqich tashkil etish uchun 2024—2026-yillarda Toshkent, Angren, Andijon, Buxoro va Termiz shaharlarida hamda Toshkent tumanidagi ko‘p qavatli uylar joylashgan hududlardagi chiqindi yig‘ish maydonchalarida chiqindilarni “qayta ishlanadigan”, “qayta ishlanmaydigan” va “oziq-ovqat” toifalariga ajratgan holda yig‘ish tashkil etiladi.
2024-yil 1-iyulga qadar mazkur hududlarda xizmat ko‘rsatuvchi sanitar tozalash korxonalari tomonidan chiqindilarni toifalariga ajratgan holda to‘plashi uchun quyidagi turdagi maxsus (QR-kod — matritsali shtrix kodli) chiqindi paketlari bilan fuqarolar bepul ta’minlanadi:
- qayta ishlanadigan maishiy chiqindilar uchun — shaffof, rangsiz;
- qayta ishlanmaydigan maishiy chiqindilar uchun — qora rang;
- oziq-ovqat chiqindilari uchun — jigarrang.
Qayta ishlanadigan qattiq maishiy chiqindilar chiqindi yig‘ish maydonchalarida sanitar tozalash korxonalari tomonidan sotib olinadi.
Izoh (0)