Тошкентда ҳуқуқ-тартибот идоралари ходимлари фуқаролар хавфсизлигини таъминлаш мақсадида назоратни кучайтирди. Бу ҳақда пойтахт ИИББ матбуот хизмати хабар берди.
Фуқаролар хавфсизлигини таъминлаш мақсадида Тошкент шаҳар ИИББ ходимлари савдо мажмуалари, кўнгилочар масканлар, бозорлар ва бошқа жамоат жойларида кучайтирилган тартибда хизмат олиб бормоқда.
Бошқарма томонидан илова қилинган суратларда тезкор вазифаларни бажарувчи сафарбарлик отрядлари ҳам жалб қилинганини кўриш мумкин.
“Мамлакатимиз, шаҳримиз ва ҳар бир маҳаллада тинчлик ва осойишталикни янада мустаҳкамлаш учун барчамиз бирдек масъулмиз. Бефарқ бўлманг”, — дейилади хабарда.
ИИВ матбуот хизматининг маълум қилишича, Ўзбекистоннинг барча ҳудудларидаги маданий кўнгилочар масканлар, йирик савдо марказлари ва деҳқон бозорлари, хиёбонлар, спорт иншоотлари ҳамда бошқа жамоат жойларида инсон хавфсизлигини таъминлашга қаратилган барча вазифалар бекаму-кўст бажарилмоқда.
Вазирлик жамоат жойларида хизмат вазифасини бажариб, жамоат хавфсизлигини таъминлаётган ҳуқуқ посбонларининг қонуний талабларини эътирозсиз бажариш зарурлигини билдириб, турли манзилларда қаровсиз қолдирилган ҳар қандай буюмни эътибордан четда қолдирмасдан, улар ҳақда дарҳол 102 рақамига хабар бериш лозимлигини эслатди.
Изоҳ (0)