Respublika bojxonachilari naqd xorijiy valyutalarning noqonuniy olib o‘tilishiga doir navbatdagi qonun buzilishi holatlarini fosh qildi. Bu haqda Bojxona qo‘mitasi matbuot xizmati xabar berdi.
Jumladan, Andijon viloyati bojxona boshqarmasining “Do‘stlik” chegara bojxona postida “yashil” yo‘lak orqali harakatlangan shaxs egnidagi kiyimining cho‘ntagiga, poyabzali ichiga hamda paypoqlari orasiga jami 32 ming 50 dollarni yashirgancha, qonunga xilof tarzda olib chiqishga uringani fosh bo‘ldi.
Toshkent xalqaro aeroportida aniqlangan holatda esa Anqaraga parvozi oldidan yo‘lovchilardan biri shimining cho‘ntagidagi 5300 dollarni bojxona nazoratiga taqdim qilmasdan, olib chiqishga uringan vaqtida to‘xtatib qolindi.
Respublika bojxonachilari o‘tgan 2023-yilda aniqlangan 238 ta bojxona qonun buzilishi holatlarida 29,5 mlrd so‘m ekvivalentdagi naqd xorijiy valyutalar, shu jumladan, 2 mln dollarning noqonuniy olib o‘tilishiga chek qo‘ydi.
2024-yilning o‘tgan davri mobaynida esa bu yo‘nalishda 98 ta bojxona qonun buzilishi fosh etilib, 4,4 mlrd so‘m ekvivalentdagi naqd xorijiy valyutalar, shu jumladan, 432 ming dollarning noqonuniy olib o‘tilishi oldi olingan.
Izoh (0)