Toshkent shahri, Qoraqalpog‘iston Respublikasi va Farg‘ona viloyatida valyuta qimmatliklarining noqonuniy muomalaga kiritilishi oldi olindi. Bu haqda Bosh prokuratura huzuridagi departament xabar berdi.
Qayd etilishicha, departamenting Yangiobod tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan O.Y. jami 4 ming dollarni fuqaro B.D.ga 50 million so‘mga sotgan vaqtida ashyoviy dalillar bilan ushlangan.
Shu kabi, departament hamda IIVning Qoraqalpog‘iston Respublikasi boshqarmasi xodimlari hamkorligida o‘tkazilgan tezkor tadbirda valyuta ayirboshlash bilan shug‘ullanib kelgan fuqaro D.R. jami 4 ming dollarni fuqaro M.D.ga 49,7 million so‘mga sotgan vaqtida ashyoviy dalillar bilan ushlangan.
Xuddi shunday, departamentning Farg‘ona viloyat boshqarmasi tomonidan IIB xodimlari bilan hamkorlikda Farg‘ona shahrida o‘tkazilgan tezkor tadbirda valyuta ayirboshlash bilan shug‘ullanib kelgan S.N. jami 3,6 ming dollarni fuqaro O.A.ga 44,9 million so‘mga sotgan vaqtida ashyoviy dalillar bilan qo‘lga olingan.
Departamentning To‘rtko‘l tuman bo‘limi tomonidan IIV xodimlari bilan hamkorlikda o‘tkazilgan tezkor tadbirda esa valyuta ayirboshlash bilan shug‘ullanib kelgan fuqaro M.S. jami 3,5 ming dollarni fuqaro H.I.dan 43,5 million so‘mga sotib olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.
Izoh (0)