Республика божхоначилари нақд хорижий валюталарнинг ноқонуний олиб ўтилишига доир навбатдаги қонун бузилиши ҳолатларини фош қилди. Бу ҳақда Божхона қўмитаси матбуот хизмати хабар берди.
Жумладан, Андижон вилояти божхона бошқармасининг “Дўстлик” чегара божхона постида “яшил” йўлак орқали ҳаракатланган шахс эгнидаги кийимининг чўнтагига, пойабзали ичига ҳамда пайпоқлари орасига жами 32 минг 50 долларни яширганча, қонунга хилоф тарзда олиб чиқишга урингани фош бўлди.
Тошкент халқаро аэропортида аниқланган ҳолатда эса Анқарага парвози олдидан йўловчилардан бири шимининг чўнтагидаги 5300 долларни божхона назоратига тақдим қилмасдан, олиб чиқишга уринган вақтида тўхтатиб қолинди.
Республика божхоначилари ўтган 2023 йилда аниқланган 238 та божхона қонун бузилиши ҳолатларида 29,5 млрд сўм эквивалентдаги нақд хорижий валюталар, шу жумладан, 2 млн долларнинг ноқонуний олиб ўтилишига чек қўйди.
2024 йилнинг ўтган даври мобайнида эса бу йўналишда 98 та божхона қонун бузилиши фош этилиб, 4,4 млрд сўм эквивалентдаги нақд хорижий валюталар, шу жумладан, 432 минг долларнинг ноқонуний олиб ўтилиши олди олинган.
Изоҳ (0)