Toshkent viloyatining Oqqo‘rg‘on, Surxondaryo viloyatining Denov tumani va Andijon shahrida “valyutchiklar” ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti matbuot xizmati xabar berdi.
Maʼlum qilinishicha, departamentning Oqqo‘rg‘on tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda valyuta ayirboshlash bilan shug‘ullanib kelgan M.Sh. jami 3 500 dollarni fuqaro X.S.ga 44,1 mln so‘mga sotgan vaqtida ashyoviy dalillar bilan ushlangan.
Xuddi shunday departamentning Denov tuman bo‘limi, DXX va IIB xodimlari hamkorligida o‘tkazilgan tezkor tadbirda valyuta ayirboshlash bilan shug‘ullanib kelgan Z.M. va S.M. jami 3 000 AQSH dollarini fuqaro M.X.ga 37,8 mln so‘mga sotgan vaqtlarida ushlanib, ularning yonidan 3045 dollar, 41 ming Rossiya rubli ashyoviy dalil sifatida olingan.
Shu kabi departamentning Andijon shahar bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan A.A. jami 2 800 dollarni fuqaro A.D.ga 35,2 mln so‘mga sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)