Qozog‘iston O‘zbekiston bilan ikki davlat tomonidan iste’mol qilinadigan suvning aniq hajmini hisoblash imkonini beruvchi hisoblagichlarni o‘rnatishga kelishib oldi. Bu haqda Qozog‘iston Suv xo‘jaligi va irrigatsiya vazirligiga tayanib, Tengrinews xabar berdi.
Ma’lum qilinishicha, Qozog‘iston O‘zbekiston hududiga va aksincha suv hisoblagichlar o‘rnatish, onlayn tarzda ma’lumotlar almashish rejalashtirilgan. Qozog‘iston O‘zbekistonda to‘plangan ma’lumotlardan, O‘zbekiston tomoni esa qo‘shni respublikadagi ma’lumotlardan foydalanish imkoniga ega bo‘ladi.
Hozirda har ikki davlat mutaxassislari suv hisoblagichlari qayerga o‘rnatilishini hal qilmoqda. Ularni ushbu loyihaga jalb etish yuzasidan xalqaro tashkilotlar bilan ham muzokaralar olib borilmoqda.
Hisoblagichlarning o‘rnatilishi har ikki davlat tomonidan isteʼmol qilinadigan suv hajmini onlayn nazorat qilish imkonini beradi. Aprel oyidayoq boshqa qo‘shnilarimiz bilan ham shunday loyihalarni amalga oshirish bo‘yicha muzokaralarni boshlashni rejalashtirganmiz, — dedi suv xo‘jaligi va irrigatsiya vaziri Nurjon Nurjigitov.
Eslatib o‘tamiz, avvalroq Nurjigitov Qizilo‘rda viloyati fermerlari bilan uchrashuvda O‘zbekiston bilan kelishuvlar haqida gapirgandi. Vazirning so‘zlariga ko‘ra, mart oyida Sirdaryo bo‘ylab soniyasiga 800 kub metr suv oqib o‘tadi.
Izoh (0)