Қозоғистон Ўзбекистон билан икки давлат томонидан истеъмол қилинадиган сувнинг аниқ ҳажмини ҳисоблаш имконини берувчи ҳисоблагичларни ўрнатишга келишиб олди. Бу ҳақда Қозоғистон Сув хўжалиги ва ирригация вазирлигига таяниб, Tengrinews хабар берди.
Маълум қилинишича, Қозоғистон Ўзбекистон ҳудудига ва аксинча сув ҳисоблагичлар ўрнатиш, онлайн тарзда маълумотлар алмашиш режалаштирилган. Қозоғистон Ўзбекистонда тўпланган маълумотлардан, Ўзбекистон томони эса қўшни республикадаги маълумотлардан фойдаланиш имконига эга бўлади.
Ҳозирда ҳар икки давлат мутахассислари сув ҳисоблагичлари қаерга ўрнатилишини ҳал қилмоқда. Уларни ушбу лойиҳага жалб этиш юзасидан халқаро ташкилотлар билан ҳам музокаралар олиб борилмоқда.
Ҳисоблагичларнинг ўрнатилиши ҳар икки давлат томонидан истеъмол қилинадиган сув ҳажмини онлайн назорат қилиш имконини беради. Апрель ойидаёқ бошқа қўшниларимиз билан ҳам шундай лойиҳаларни амалга ошириш бўйича музокараларни бошлашни режалаштирганмиз, — деди сув хўжалиги ва ирригация вазири Нуржон Нуржигитов.
Эслатиб ўтамиз, аввалроқ Нуржигитов Қизилўрда вилояти фермерлари билан учрашувда Ўзбекистон билан келишувлар ҳақида гапирганди. Вазирнинг сўзларига кўра, март ойида Сирдарё бўйлаб сониясига 800 куб метр сув оқиб ўтади.
Изоҳ (0)