Yevropa Ittifoqining tashqi siyosat bo‘yicha vakili Jozep Borrelning aytishicha, Rossiyada prezidentlik saylovlari erkin va adolatli o‘tmagan, aksincha qatag‘on va qo‘rqitish asosida o‘tgan. Bugun, 18-mart kuni Yevropa Ittifoqi davlatlari Rossiya saylovlari bo‘yicha qo‘shma bayonot e’lon qiladi.
“Bu saylov repressiya va qo‘rqitishga asoslangan edi”, dedi Jozep Borrel Bryusselda jurnalistlarga bergan intervyusida. Uning ta’kidlashicha, saylovlar “erkin va adolatli” bo‘lmagan, chunki haqiqiy muxolifatga yo‘l berilmadi va xalqaro kuzatuvchilar qatnashmadi. Avvalroq Polsha va Britaniya rasmiylari Rossiya saylovlarini erkin emas deb atagan edi.
Jozep Borrel, shuningdek, bugun YI aʼzolari Yevropa sammitida Ukrainaga 5 milliard yevro (5,45 milliard dollar) miqdoridagi harbiy yordam paketini maʼqullashiga umid bildirdi.
“Bir necha haftadan beri bu masala muhokama qilinmoqda, umid qilamanki, bugun vazirlar Ukrainaga harbiy yordamimizni oshirish uchun buni, albatta, ma’qullaydilar”, — dedi u Yevropa Ittifoqi tashqi ishlar vazirlari yig‘ilishidan oldin.
Rossiya Markaziy saylov komissiyasi amaldagi prezident Vladimir Putin saylovda 87,31 foiz ovoz olganini ma’lum qilgan.
Izoh (0)