Европа Иттифоқининг ташқи сиёсат бўйича вакили Жозеп Боррелнинг айтишича, Россияда президентлик сайловлари эркин ва адолатли ўтмаган, аксинча қатағон ва қўрқитиш асосида ўтган. Бугун, 18 март куни Европа Иттифоқи давлатлари Россия сайловлари бўйича қўшма баёнот эълон қилади.
“Бу сайлов репрессия ва қўрқитишга асосланган эди”, деди Жозеп Боррел Брюсселда журналистларга берган интервьюсида. Унинг таъкидлашича, сайловлар “эркин ва адолатли” бўлмаган, чунки ҳақиқий мухолифатга йўл берилмади ва халқаро кузатувчилар қатнашмади. Аввалроқ Польша ва Британия расмийлари Россия сайловларини эркин эмас деб атаган эди.
Жозеп Боррел, шунингдек, бугун ЕИ аъзолари Европа саммитида Украинага 5 миллиард евро (5,45 миллиард доллар) миқдоридаги ҳарбий ёрдам пакетини маъқуллашига умид билдирди.
“Бир неча ҳафтадан бери бу масала муҳокама қилинмоқда, умид қиламанки, бугун вазирлар Украинага ҳарбий ёрдамимизни ошириш учун буни, албатта, маъқуллайдилар”, — деди у Европа Иттифоқи ташқи ишлар вазирлари йиғилишидан олдин.
Россия Марказий сайлов комиссияси амалдаги президент Владимир Путин сайловда 87,31 фоиз овоз олганини маълум қилган.
Изоҳ (0)