Isroil bosh vaziri Binyamin Netanyaxuning rafiqasi Sara HAMAS tomonidan garovga olingan isroilliklarni ozod qilish maqsadida Qatar amirining onasi Moza bint Naser Al-Missnedga maktub yo‘lladi. Bu haqda The Jerusalem Post xabar berdi.
“Men juda dolzarb va muhim masala — HAMAS tomonidan o‘g‘irlab ketilgan va G‘azoda ushlab turilgan isroilliklarning og‘ir ahvoli yuzasidan murojaat qilmoqchiman. Ayoldan ayolga garovga olinganlar orasida aqlbovar qilmaydigan azob-uqubatlarni boshdan kechirishga majbur bo‘lgan 19 ayol borligini yetkazish muhimdir. Jinsiy zo‘ravonlik va zo‘rlash haqidagi xabarlar dahshatli va ayollarga qarshi bunday harakatlarni e’tiborsiz qoldirib bo‘lmaydi.
Sizni Ramazon oyi ruhida isroillik garovga olinganlarni ozod qilish uchun o‘z ta’siringizdan foydalanishga chaqiraman. Ayollar qadr-qimmati va xavfsizligi xavf ostida qolganda biz jim tura olmaymiz yoki orqada turolmaymiz”, — degan u.
Netanyaxuning maktubi so‘nggi haftalarda Isroil va HAMAS o‘rtasida o‘t ochishni to‘xtatish bo‘yicha yangi sa’y-harakatlar, Qatar muhim vositachi sifatida harakat qilayotgan bir paytga to‘g‘ri keldi.
Avvalroq BMT ekspertlari G‘azoda ayol va qizlar Isroil harbiylari tomonidan zo‘rlangan, sababsiz qatl qilinganini ma’lum qilgandi. Falastinlik ayollar G‘azoda oila a’zolari, jumladan, farzandlari bilan birga asossiz qatl etilgan holatlar bo‘lgan.
Mutaxassislar 7-oktyabrdan beri G‘azoda yuzlab falastinlik ayollar va qizlar, jumladan, huquq himoyachilari, jurnalistlar sababsiz hibsga olinganidan jiddiy xavotir bildirgan. Ularning ko‘pchiligi g‘ayriinsoniy va qadr-qimmatni kamsituvchi munosabatga duchor bo‘lgan, ayollar gigiyenik vositalar, oziq-ovqat va dori-darmonlar bilan ta’minlanmagan. Kamida bir marta G‘azoda qo‘lga olingan falastinlik ayollar yomg‘ir va sovuqda, oziq-ovqatsiz qafasda saqlangan.
Izoh (0)