Ukraina hududida harbiy mojaro boshlanganidan keyin Yevropa Ittifoqiga aʼzo davlatlar mudofaa sohasida ishlab chiqarishni 50 foizga oshirdi, dedi Yevropa diplomatiyasi rahbari Josep Borrel.
Shu bilan birga, Borrel yaqin kelajakdagi asosiy vazifa ishlab chiqarish hajmini emas, balki sanoatni moliyalashtirishni ko‘paytirish ekanini ta’kidladi.
“Yevropa mudofaa sanoati urush boshlanganidan beri o'z quvvatini 50 foizga oshirdi, bu hayratlanarli darajada o'sishdir. Bugun bizda ishlab chiqarish quvvati emas, balki moliya yetishmaydi. Bu asosiy yo‘nalish hisoblanadi. Biz hamkorlik qilishimiz va sanoatning o‘sib borayotgan talabni qondirish imkoniyatiga ega bo‘lishini ta’minlashga intilishimiz kerak”, — dedi Borrel Bryusseldagi matbuot anjumanida.
Bugun taqdim etilgan YI harbiy-sanoat kompleksini rivojlantirish strategiyasida 2030-yilga borib aʼzo davlatlar hamkorlik asosida mudofaa texnikasining kamida 40 foizini xarid qilishni boshlashini nazarda tutadi. 2022-yilda mudofaa texnikasining atigi 18 foizi hamkorlik orqali xarid qilingan.
Bundan tashqari, olti yil ichida Yevropa Ittifoqi davlatlari ichki bozordagi mudofaa savdosining qiymati ittifoqning umumiy mudofaa bozorining kamida 35 foizini tashkil etadigan darajaga yetishi kerak. Shuningdek, Yevropa Ittifoqi mamlakatlari 2030-yilgacha mudofaa xaridlari byudjetining kamida 50 foizini va 2035-yilga kelib 60 foizini o‘z korxonalariga o‘zlashtirish bo‘yicha barqaror taraqqiyotga erishishi rejalashtirilgan.
Izoh (0)