“Mehridaryo” loyihasiga Qo‘qon shahrida yashovchi Ziyodaxon Abdullayeva murojaat qilib, oqqonga chalingan qizi Zuhra Nomozboyevani davolatish uchun xalqdan yordam so‘radi.
— Egizak qizlarimning kenjasi Zuhraxon 2022-yildan buyon oqqon kasalligiga qarshi davolanib keladi. Hozir ham Toshkentdagi bolalar gematologiya markazida davolanyapmiz. Afsuski, unda quloq kasalligi ham aniqlandi. Kundan-kunga eshitish qobiliyatini yo‘qotyapti. Yaʼni quloq pardasi orqali suv yig‘ilib borayotgan ekan. Shifokorlarning aytishicha, tezda kuchli antibiotiklarni qo‘llash yoki jarrohlik amaliyotini o‘tkazish kerak. Shifokorlar yozgan qog‘oz bilan dorixonaga bordim, ammo bizga kerakli bo‘lgan antibiotikning bir ampulasi 350 ming so‘m ekan. Pulim yo‘q, turmush o‘rtog‘im bizdan voz kechgan. Uch bolam bilan ota-onamning uyida yashaymiz. Bemor bolam sabab ishga ham chiqolmayman. Shu bois odamlardan yordam so‘rashga majbur bo‘ldim.
“Zuhraxonning egizak opasida ham kasallik boshlanishi mumkin”, degan gapni eshitib kuchli depressiyaga tushib qoldim. Bolaning joni og‘rishi ona uchun og‘ir dard ekan. Qizim har kuni “Ona endi yana bir kasallik bilan kurashishim kerakmi?” deb yig‘laydi. Yoshi ulg‘ayib qolgani uchun qulog‘ining eshitmayotganini og‘ir qabul qilyapti. Shu bois xalqdan yordam so‘rab, uning eshitish qobiliyatini saqlab qolishga harakat qilmoqchiman. Ulug‘ ayyom kunlari saxovatpesha insonlar bizga yordam berishlaridan umidvorman, — deydi Ziyodaxon Abdullayeva.
Zuhraxon Namozboyevaga xayriya qilishni istasangiz,
8600 0417 3447 5628 (Abdullayeva Ziyodaxon)
Murojaat uchun: +99890) 570-49-85
Izoh (0)