Baʼzan dunyoning arzimas muammolariga uchraganda tushkunlikka tushib, noshukrlik qilamiz. Bizdagi ko‘p neʼmatlar dunyoning minglab, balki millionlab insonlari uchun orzu ekanini unutib qo‘yamiz. “Taskin” loyihasining navbatdagi qahramoni Shamshod Sobirovning hayoti ham sizni mulohazaga chorlasa ajab emas.
— 15 yil avval uchinchi farzandimga homilador bo‘ldim. Hammasi risoladagidek o‘tib, o‘g‘il farzandli bo‘ldim. Yaxshi niyatlar bilan unga Shamshod deb ism qo‘ydik. Bir oylik chaqaloqligida ko‘zida yaltiroq narsa paydo bo‘ldi. Avvaliga uning nima ekanini bilmadik. Shifokorlar tekshirib ko‘zidagi yaltiroq narsa xavfli o‘simtaligini aniqlashdi. Avvaliga tushkunlikka tushdik, ammo hammasi Allohning sinovi dedim. Chilla davri chiqmay turib, o‘g‘limning bir ko‘zini olib tashlashdi. Bir ko‘zi bilan olamni ko‘rayotganidan quvonib yurgandik. Ammo olti yoshligida ham xuddi shunday o‘simta ikkinchi ko‘zida aniqlandi. Davolash imkonsiz bo‘lgani uchun shifokorlar ikkinchi ko‘zini ham olib tashlashdi. O‘g‘lim maktabga chiqmay turib ikki ko‘zidan ayrildi. Ammo Allohning qudrati bilan o‘g‘limda kuchli zehn paydo bo‘ldi. U eshitganini yodlab oladi, xotirasi mustahkam. Oilamizda hech kimning diniy ilmi yo‘q. Bolam sabab biz ham sekin asta o‘rganyapmiz, — deydi Gulruh Sobirova.
— Men Buxoro viloyatidagi 24-sonli “Nurli maskan” maktabida o‘qiyman. Har doim aʼlo baholarga o‘qishga harakat qilaman, tarix faniga qiziqaman. Kelajakda tarix yo‘nalishi bo‘yicha o‘qishni davom ettirishni istayman. Arab tiliga qiziqishimga boshlang‘ich sinf ustozim Dilfuza Hamroqulova sababchi bo‘lgan. U kishi meni kursga olib borib, ilk saboqni bergan. Undan keyin Fayoz qoridan ilm olyapman. Ustozlarimga rahmat aytaman, ular sabab ko‘p narsalarni o‘rgandim, — deydi Shamshod Sobirov.
2022-yil Shamshod Sobirov oilasiga nihoyatda sinovli keldi. Uning ikki qo‘lida ham xavfli o‘simta aniqlandi va Toshkentlik shifokorlar zudlik bilan qo‘llarini yelka qismidan olib tashlash kerakligi, bo‘lmasa saraton butun tana bo‘ylab tarqalishi haqida ogohlantirishdi. Dunyoni qo‘llari bilan paypaslab his qiladigan, barmoqlari yordamida ilm o‘rganayotgan bolakay uchun bu dahshatli xabar edi. Shunda ota-onasiga Hindistonga olib borish va jarrohlik amaliyotini u yerda o‘tkazishni tavsiya qilishdi. Ammo kamtarin hayot kechiradigan oilaning bunga imkoniyati yo‘q edi. Yaxshi insonlar bor bo‘lishsin, ularning moliyaviy ko‘magi bilan Shamshod Sobirovning qo‘llari saqlab qolindi, bir necha soat davom etgan murakkab operatsiyada xorijlik shifokorlar qo‘llardagi o‘simtani igna uchida tergandek olib tashlashdi.
Shu kungacha 17 kurs olingan kimyoterapiya natijasida ham saraton bolakay tanasini butunlay tark etgani yo‘q. Hozir ham u muolajalarni davom ettirmoqda. Ammo bolakay ham, uning oila aʼzolari ham tushkunlikka tushmaydi. Kelajakka yaxshi maqsadlar ila intilishmoqda. Shamshod Sobirov kelajakda tarix fani o‘qituvchisi bo‘lishni va o‘zi kabi imkoniyati cheklangan bolalarga arab tilidan saboq berishni niyat qilgan.
Izoh (0)