“Mehridaryo” loyihasiga farzandlari bilan Toshkentda, ijara uyda yashayotgan Nargiza Holiqulova murojaat qilib, baxtsiz voqea sabab to‘shakka mixlanib qolgan o‘g‘li Begzod Lapasovni davolatish uchun xalqdan yordam so‘radi.
— To‘rt nafar farzandim bor, yetti yildan buyon turmush o‘rtog‘im bilan birga yashamaymiz. Ko‘p qiyinchiliklarni boshdan kechirdim, turmush o‘rtog‘im tinimsiz spirtli ichimlik ichgani uchun bolalarini olib uydan chiqib ketganman. Ayni damda ikki o‘g‘lim va qizim bilan Toshkentda ijara uyda yashaymiz. Yana bir o‘g‘lim esa otasi bilan qolgan.
Yozda o‘g‘lim Begzod Lapasov otasini ko‘rgani Chinozga borganda o‘rtoqlari kanalda suzishga chaqirgan. O‘sha yerda baxtsiz hodisa ro‘y berib, balandlikdan sakraganida boshi bilan yerga tushgan. O‘rtoqlari qo‘rqib uni tortgan, shunda bo‘ynidagi nerv tomirlari uzilib ketgan. Avval Chinozda, keyin Toshkentda davolatdik. Shifokorlarga ming rahmat, olti soat operatsiya qilib, o‘g‘limning jonini saqlab qolishdi. O‘g‘lim ikki oy deganda kasalxonadan chiqdi. Ammo haligacha qo‘l oyog‘i ishlamaydi. Shol bo‘lib qoldi. Ovqat va suvni ham o‘zim og‘ziga tutaman, gap-so‘zlari joyida, ammo qimir etmaydi. Mablag‘im bo‘lmagani uchun uni davolata olmayapman.
Dorilarini ham vaqtida olib berolmayman. Tashkent City’da qozon yuvuvchi bo‘lib ishlayman, topganimiz ijara uy va ro‘zg‘ordan ortmaydi. O‘g‘lim juda qiynalib ketdi, iltimos yaxshi insonlar, bizga yordam bering. Xorijga olib borib davolatolmasam ham, hech bo‘lmasa toshkentlik shifokorlar qabuliga olib boray. Ona hech qachon umidini uzmas ekan, men ham bolamning sog‘ayib ketishidan umidvorman, — deydi Nargiza Holiqulova.
Begzod Lapasovga xayriya qilishni istasangiz,
4023 0602 3888 3150
5614 6821 2364 4629
Xalikulova Nargiza (onasi)
Murojaat uchun: +99899 301-01-75
Izoh (0)