Rossiyalik milliarderlar orasida eng ko‘p mablag‘ yo‘qotgan inson Telegram asoschisi Pavel Durov bo‘ldi — u bir yil ichida 3,6 milliard dollaridan ayrilgan, deb xabar beradi Forbes.
Jurnal ma’lumotlariga ko‘ra, 2023-yilda Durovning boyligi 11,5 milliard dollarga baholanmoqda. Umumiy hisobda Forbes ro‘yxatidagi 110 kishidan 13 nafarining boyligi jami 8,5 milliard dollarga kamaygan.
Telegram raqobatchilari — WhatsApp hamda Snapchat messenjeriga egalik qiluvchi Snap kompaniyasi kotirovkalarining qulashi Telegram qiymatiga ham ta’sir ko‘rsatdi. Forbes’ning Rossiya reytingida 2022-yili uchinchi o‘rinda bo‘lgan Durov hozirda 10-o‘ringa tushib ketdi.
Forbes ro‘yxatidagi “qashshoqlashgan” boshqa milliarderlar:
- Leonid Boguslavskiy (Fatadog kompaniyasi egasi, 2022-yil fevralida 174,51 milliard bo‘lgan kapitalizatsiyasi 2023-yil fevralida 78,35 milliard dollarga qadar tushib ketgan). Uning boyligi 1,1 milliard dollarga kamaygan bo‘lib, hozirda 3,6 milliard dollarni tashkil etmoqda;
- Dmitriy va Igor Buxmanlar, ularga Playrix o‘yinlarini yaratish bilan shug‘ullanuvchi dasturchilar kompaniyasi tegishli. Ularning har biri 1,1 milliard dollar yo‘qotgan bo‘lib, hozirda ularning boyligi 7 milliard dollarni tashkil etmoqda.
Shuningdek, ro‘yxatda Farhad Ahmedov (-600 million dollar), Oleg Boyko (-200 million dollar), Dmitriy Ribolovlev (-200 million dollar), Pyotr Aven, Yelena Baturina, Andrey Kosogov, Aleksandr Mamut, Aleksandr Svetakov va Gleb Fetisov (har birining boyligi 100 million dollardan kamaygan) ham o‘rin olgan.
2023-yilda eng boy rossiyalik deya “Yevroxim” va “SUEK” asoschisi Andrey Melnichenko topilgan (25,2 milliard dollar).
Durov o‘tgan yili Forbes talqiniga ko‘ra Dubaydagi eng boy odam deb topilgan edi. 2023-yil fevral oyida esa Telegram messenjeri asoschisi Pavel Durov Arabian Business talqiniga ko‘ra Dubaydagi eng nufuzli shaxs deb tan olingan.
Izoh (0)