Moldova prezidenti Mayya Sandu Fransiya prezidenti Emmanuel Makron bilan Parijda o‘tkazgan qo‘shma matbuot anjumanida Rossiya Moldovani energetik shantaj, dezinformatsiya, norozilik namoyishlariga homiylik qilish, saylovlarga aralashish va davlat to‘ntarishiga urinishlar orqali nazorat qilishga intilayotganini aytdi, deb yozadi Reuters.
Parijdagi uchrashuvda Moldova va Fransiya prezidentlari mudofaa va hamkorlik bo‘yicha ikki tomonlama shartnoma imzoladi.
“Agar agressor to‘xtatilmasa, u davom etadi va front chizig‘i bizga yaqinlashadi. Shuning uchun Yevropa birlashishi kerak. Agressiya unga munosib kuch tomonidan qaytarilishi kerak”, — dedi Sandu.
Emmanuel Makron, o‘z navbatida, Fransiya Moldovani “doimiy qo‘llab-quvvatlashini” ma’lum qildi, deya xabar beradi AFP.
6-mart kuni Rossiya prezidenti Vladimir Putin Sochidagi yoshlar forumi doirasida Gagauziya (Moldova tarkibidagi avtonom hududiy tuzilma) rahbari Yevgeniya Gutsul bilan uchrashdi. U Moldovaning muxolifat partiyasi bo‘lgan “Shor” partiyasidan nomzodini qo‘ygan va 2023-yilning may oyida mintaqa rahbariga aylangandi.
Bugun, 7-mart kuni partiya rahbari Ilan Shor Moldova hukumati Gutsul xonimni 7-mart kuni Kishinyovga yetib kelganidan so‘ng hibsga olishni rejalashtirayotganini aytdi. Bir kun avval Moldova Bosh prokuraturasi Gagauziya rahbari ishini sudga yuborishga tayyorligini ma’lum qilgan edi.
Izoh (0)