Молдова президенти Майя Санду Франция президенти Эммануэль Макрон билан Парижда ўтказган қўшма матбуот анжуманида Россия Молдовани энергетик шантаж, дезинформация, норозилик намойишларига ҳомийлик қилиш, сайловларга аралашиш ва давлат тўнтаришига уринишлар орқали назорат қилишга интилаётганини айтди, деб ёзади Reuters.
Париждаги учрашувда Молдова ва Франция президентлари мудофаа ва ҳамкорлик бўйича икки томонлама шартнома имзолади.
“Агар агрессор тўхтатилмаса, у давом этади ва фронт чизиғи бизга яқинлашади. Шунинг учун Европа бирлашиши керак. Агрессия унга муносиб куч томонидан қайтарилиши керак”, — деди Санду.
Эммануэль Макрон, ўз навбатида, Франция Молдовани “доимий қўллаб-қувватлашини” маълум қилди, дея хабар беради AFP.
6 март куни Россия президенти Владимир Путин Сочидаги ёшлар форуми доирасида Гагаузия (Молдова таркибидаги автоном ҳудудий тузилма) раҳбари Евгения Гуцул билан учрашди. У Молдованинг мухолифат партияси бўлган “Шор” партиясидан номзодини қўйган ва 2023 йилнинг май ойида минтақа раҳбарига айланганди.
Бугун, 7 март куни партия раҳбари Илан Шор Молдова ҳукумати Гуцул хонимни 7 март куни Кишинёвга етиб келганидан сўнг ҳибсга олишни режалаштираётганини айтди. Бир кун аввал Молдова Бош прокуратураси Гагаузия раҳбари ишини судга юборишга тайёрлигини маълум қилган эди.
Изоҳ (0)