Moldova hukumati “yashil energiyaga o‘tish bo‘yicha juda ambitsiyali reja”ni tayyorlamoqda, shuning uchun mamlakat Rossiya gazi va elektr energiyasisiz ham “omon qoladi”, dedi respublika bosh vaziri Dorin Rechan.
“Omon qolishimiz, Rossiyadan gaz va elektr energiyasi olmasdan ham tinch yashashda davom etishimiz mumkin. Bu, albatta, yuqori narxlar degani, shuningdek, jamiyatning zaif qatlamlari va raqobatdan jabr ko‘rgan korxonalar haqida qayg‘urishimiz kerakligini anglatadi. Biznes moslashguncha, muayyan davr uchun kompensatsiya vositalarini topishimiz kerak”, — dedi hukumat rahbari.
Uning so‘zlariga ko‘ra, Moldova hukumatida “yashil energiyaga o‘tish bo‘yicha juda katta reja” bor, bu esa “raqobatbardosh iqtisodiyot, sarmoyaviy muhitga kirish” imkonini beradi.
2022-yil aprel oyida Moldova prezidenti Mayya Sandu mamlakat Rossiya gazidan voz kecha olmasligini, muqobil variantlar yo‘qligini aytgandi. Iyun oyida u Rossiya gazdan Moldovaning Yevropa Ittifoqiga qo‘shilishiga yo‘l qo‘ymaslik uchun foydalanishi mumkinligini ta’kidladi.
2023-yil fevral oyi oxirida Infratuzilma va mintaqaviy rivojlanish vaziri Andrey Spinu Moldova Rossiyadan gazga qaramlikni to‘xtatganini e’lon qildi. “Tarixda birinchi marta mamlakatimiz o‘ng qirg‘og‘i ‘Gazprom’ tomonidan yetkazib beriladigan gazni isteʼmol qilmaydi. O‘tgan yildan beri zaxiralarni yaratamiz va bir manbaga qaramlikni to‘xtash uchun muqobillarni topamiz, deb va’da berib keldik. Biz bunga erishdik”, — dedi u.
Izoh (0)