Shavkat Umurzoqov Toshkent shahrida 500 gektardan ortiq maydondagi uy-joylar talabga javob bermaydigan holatdaligi uchun renovatsiya dasturiga kiritilganini ma’lum qilgandi. “Milliy tiklanish” demokratik partiyasi buni tegishli qonun ishlab chiqilib, qabul qilinganidan keyingina amalga oshirish maqsadga muvofiq deb topdi.
Poytaxt hokimi vazifasini bajaruvchi Shavkat Umurzoqov uy-joylar talabga javob bermaydigan holatdaligi uchun renovatsiya dasturiga kiritilgani haqida “O‘zbekiston 24” telekanaliga bergan intervyusida aytib o‘tgandi. Ushbu masala, ko‘plab fuqarolar, shu jumladan, ijtimoiy tarmoq foydalanuvchilarining muhokamalariga sabab bo‘lmoqda.
“Milliy tiklanish” demokratik partiyasi matbuot xizmatining bildirishicha, renovatsiyaning mustahkam qonuniy asosi bo‘lishi va bu boradagi dasturlar uy-joy mulkdorlari hamda keng jamoatchilik fikrini inobatga olgan holda amalga oshirilishi zarur.
“Foydalanishga yaroqsiz, eskirgan ko‘p qavatli uy-joylar o‘rniga yangilarini qurish yaxshi, albatta. Bu bilan poytaxtimiz obod bo‘ladi, ko‘chalarimiz ko‘rkamlashadi, aholini uy-joy bilan taʼminlash ishlari jadallashadi.
Biroq renovatsiya dastularini ishlab chiqish uchun, eng avvalo, ushbu jarayonni ochiq va shaffof amalga oshirishning qonuniy asoslari, renovatsiya tartibi va qoidalari bo‘lishi lozim. Qolaversa, renovatsiya dasturi loyihasi renovatsiyaga tushadigan uy-joy mulkdorlarining roziligiga asoslanishi hamda keng jamoatchilik muhokamalaridan o‘tkazilishi shart”, — deyiladi partiya xabarida.
Qayd etilishicha, renovatsiya bo‘yicha qonun qabul qilinmasdan, bu ishlar amalga oshirilsa, “snos” degan holatga o‘xshash jarayonlar boshlanib ketishi ehtimoldan yiroq emas.
Partiya yangilangan konstitutsiyaning 49-moddasida shaharsozlik hujjatlari loyihalari qonunda belgilangan tartibda jamoatchilik muhokamasidan o‘tkazilishi qatʼiy belgilanganini, uy-joy mulkdorlari huquqlari esa asosiy qonunning tegishli moddalari bilan qatʼiy kafolatlanganini eslatib o‘tdi.
“Qolaversa, O‘zbekistonga ko‘plab investorlar kelayotgan, turizm rivojlanayotgan bir sharoitda Toshkentning qadimiy va tarixiy ahamiyatga molik binolarini, ko‘p qavatli turar joylarni, umuman olganda, shaharning tarixiy qiyofasi va arxitekturasini ham saqlab qolishimiz shart.
Shu bois hukumat va Toshkent shahar hokimligi, eng avvalo, renovatsiya to‘g‘risidagi qonunni ishlab chiqib, parlament qabul qilgandan keyingina renovatsiya bilan bog‘liq dasturlarni amalga oshirishini maqsadga muvofiq, deb hisoblaymiz”, — deyiladi partiya xabarida.
Izoh (0)