Toshkentda yo‘l bo‘yidagi aholi xonadonlari hamda xizmat ko‘rsatish obyektlari ko‘p qavatli qilib qayta qurilishi mumkin. Bu reja ko‘zda tutilgan hukumat qarori loyihasi jamoatchilik muhokamasi uchun e’lon qilindi. “Adolat” SDP faollari, ekspertlari tomonidan mazkur qaror loyihasi atroflicha o‘rganilib, tahlil etilganida unda rejalashtirilayotgan ayrim masalalar yuzasidan savollar yuzaga keldi.
Taklif etilayotgan qaror loyihasiga ko‘ra, Chilonzor tumani hududidan Do‘mbirobod, Kichik halqa yo‘li, Dilxush 2-tor ko‘chasi kesishmalari oralig‘ida joylashgan yo‘l bo‘yidagi aholi xonadonlari va xizmat ko‘rsatish obyektlarini renovatsiya asosida ko‘p qavatli qilib qayta qurish hamda birinchi qavatida yangi zamonaviy xizmat ko‘rsatish obyektlarini tashkil etish rejalashtirilmoqda.
Partiya matbuot xizmatining bildirishicha, renovatsiyaning mustahkam huquqiy asosi, xususan, uni amalga oshirishning qatʼiy talab va tartiblari, uy-joy mulkdorlari huquqlariga rioya etish kafolatlari bo‘lmasdan turib, bu borada loyihalarning amalga oshirilishi jismoniy va yuridik shaxslarning manfaatlariga putur yetkazishi mumkin.
Shu sababli, “Adolat” sotsial-demokratik partiyasi mazkur qaror loyihasini renovatsiyaga oid qonunchilik asoslari mavjud emasligini hamda keng jamoatchilik, shu jumladan Chilonzor tumani aholisi bilan har tomonlama muhokama qilib, ularni fikrini inobatga olgan holda takomillashtirish maqsadga muvofiq, deb hisobladi.
Izoh (0)