Шавкат Умурзоқов Тошкент шаҳрида 500 гектардан ортиқ майдондаги уй-жойлар талабга жавоб бермайдиган ҳолатдалиги учун реновация дастурига киритилганини маълум қилганди. “Миллий тикланиш” демократик партияси буни тегишли қонун ишлаб чиқилиб, қабул қилинганидан кейингина амалга ошириш мақсадга мувофиқ деб топди.
Пойтахт ҳокими вазифасини бажарувчи Шавкат Умурзоқов уй-жойлар талабга жавоб бермайдиган ҳолатдалиги учун реновация дастурига киритилгани ҳақида “Ўзбекистон 24” телеканалига берган интервьюсида айтиб ўтганди. Ушбу масала, кўплаб фуқаролар, шу жумладан, ижтимоий тармоқ фойдаланувчиларининг муҳокамаларига сабаб бўлмоқда.
“Миллий тикланиш” демократик партияси матбуот хизматининг билдиришича, реновациянинг мустаҳкам қонуний асоси бўлиши ва бу борадаги дастурлар уй-жой мулкдорлари ҳамда кенг жамоатчилик фикрини инобатга олган ҳолда амалга оширилиши зарур.
“Фойдаланишга яроқсиз, эскирган кўп қаватли уй-жойлар ўрнига янгиларини қуриш яхши, албатта. Бу билан пойтахтимиз обод бўлади, кўчаларимиз кўркамлашади, аҳолини уй-жой билан таъминлаш ишлари жадаллашади.
Бироқ реновация дастуларини ишлаб чиқиш учун, энг аввало, ушбу жараённи очиқ ва шаффоф амалга оширишнинг қонуний асослари, реновация тартиби ва қоидалари бўлиши лозим. Қолаверса, реновация дастури лойиҳаси реновацияга тушадиган уй-жой мулкдорларининг розилигига асосланиши ҳамда кенг жамоатчилик муҳокамаларидан ўтказилиши шарт”, — дейилади партия хабарида.
Қайд этилишича, реновация бўйича қонун қабул қилинмасдан, бу ишлар амалга оширилса, “снос” деган ҳолатга ўхшаш жараёнлар бошланиб кетиши эҳтимолдан йироқ эмас.
Партия янгиланган конституциянинг 49-моддасида шаҳарсозлик ҳужжатлари лойиҳалари қонунда белгиланган тартибда жамоатчилик муҳокамасидан ўтказилиши қатъий белгиланганини, уй-жой мулкдорлари ҳуқуқлари эса асосий қонуннинг тегишли моддалари билан қатъий кафолатланганини эслатиб ўтди.
“Қолаверса, Ўзбекистонга кўплаб инвесторлар келаётган, туризм ривожланаётган бир шароитда Тошкентнинг қадимий ва тарихий аҳамиятга молик биноларини, кўп қаватли турар жойларни, умуман олганда, шаҳарнинг тарихий қиёфаси ва архитектурасини ҳам сақлаб қолишимиз шарт.
Шу боис ҳукумат ва Тошкент шаҳар ҳокимлиги, энг аввало, реновация тўғрисидаги қонунни ишлаб чиқиб, парламент қабул қилгандан кейингина реновация билан боғлиқ дастурларни амалга оширишини мақсадга мувофиқ, деб ҳисоблаймиз”, — дейилади партия хабарида.
Изоҳ (0)