O‘zbekistonda giyohvandlik moddalarini “narkograffiti” — noqonuniy tashkil etilgan internet-do‘kon manzili haqida maʼlumot devor va yo‘laklarga chizish usuli orqali tarqatish keskin ortmoqda. Bu haqda Qonunchilik palatasida o‘tkazilgan majlisda ma’lum qilindi.
Qayd etilishicha, giyohvandlik vositalari, ularning analoglari, psixotrop va kuchli taʼsir qiluvchi moddalar bilan qonunga xilof ravishda muomala qilish, jumladan, ularni isteʼmol qilish bilan bog‘liq jinoyatlarga yoshlarni, ayniqsa, voyaga yetmaganlarni jalb qilish ham ko‘payib bormoqda. Shuningdek, voyaga yetmaganlar o‘rtasida giyohvandlikka chalinganlar soni ortib bormoqda.
“Yuqoridagi holatlar giyohvandlik vositalari, ularning analoglari, psixotrop moddalar va kuchli taʼsir qiluvchi moddalarning noqonuniy muomalasiga qarshi kurashish borasida ishlarni jadallashtirish, barvaqt profilaktika chora-tadbirlari samaradorligini oshirishni talab etmoqda”, — deyiladi xabarda.
Shundan kelib chiqib, mazkur yo‘nalishda amalga oshirilayotgan ishlar holati yuzasidan asoslantirilgan javob olish maqsadida Qonunchilik palatasining navbatdagi majlisida ichki ishlar vaziri Po‘lat Bobojonovga “Giyohvandlik vositalari, ularning analoglari, psixotrop moddalar va kuchli taʼsir qiluvchi moddalarning qonunga xilof ravishda muomalada bo‘lishiga qarshi kurashish borasida amalga oshirilayotgan ishlar to‘g‘risida” parlament so‘rovi yubordi.
Eslatib o‘tamiz, 2023-yil avgust boshlarida DXX Samarqand viloyatida giyohvand moddalar oldi-sotdisi bilan shug‘ullanib kelgan guruhni qo‘lga olgandi. O‘shanda Urgut tumanida yashovchi 1978 va 1986-yillarda tug‘ilgan opa-singil 911 gramm opiy giyohvandlik moddasini 12 ming AQSH dollariga sotgan vaqtida ushlangan. Shuningdek, Toshkentda Kia mashinasida narkokuryerlik bilan shug‘ullangan shaxs ushlangani to‘g‘risida xabar berilgandi.
Izoh (0)