Toshkent shahar IIBB xodimlari tomonidan giyohvandlik vositalari, psixotrop moddalar va ularning analoglari bilan qonunga xilof ravishda muomala qilish holatlarini aniqlash va ularga chek qo‘yish bo‘yicha ishlar amalga oshirilmoqda.
Jumladan, 28-iyul kuni Sergeli tumani Yangi Sergeli ko‘chasida tuman IIO FMB Tezkor-qidiruv xizmati xodimlari va boshqa huquqni muhofaza qiluvchi idoralar xodimlari bilan hamkorlikda o‘tkazilgan maxsus profilaktika tadbiri davomida 36 yoshli Zafar J. boshqaruvidagi Kia K-5 rusumli avtomashina to‘xtatilgan.
Mashina xolislar ishtirokida ko‘zdan kechirilganda avtoulov salonida 48 dona izolenta o‘ramida oq rangli kukunsimon modda va 20 dona “Regopen” hamda 6 ta kapsula “Zardeks” borligi aniqlangan. Gumonlanuvchi yaqin oradagi IIBga olib kelingan. Suhbat davomida fuqaro ushbu ishni Telegram messenjeri orqali topganini aytgan.
Mazkur holat yuzasidan Sergeli tumani IIO FMB huzuridagi tergov bo‘limi tomonidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni qonunga xilof ravishda tayyorlash, olish, saqlash va boshqa harakatlar qilish) bilan jinoyat ishi qo‘zg‘atilgan. Gumonlanuvchiga nisbatan qamoq ehtiyot chorasi qo‘llangan. Tergov davom etmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)