Bugun, 14-noyabr kuni bo‘lib o‘tayotgan Oliy Majlisi Qonunchilik palatasining navbatdagi majlisida deputatlar bosh vazir o‘rinbosari Ochilboy Ramatovning parlament so‘roviga yuborgan javobini qabul qilmadi.
Qonunchilik palatasining 2023-yil 19-sentyabrdagi qarori bilan bosh vazir o‘rinbosari Ochilboy Ramatovga yo‘l harakati xavfsizligini ta‘minlash sohasiga zamonaviy axborot texnologiyalarini joriy etish borasida amalga oshirilayotgan ishlar holati yuzasidan parlament so‘rovi yuborilgan. Joriy yil 26-oktyabr kuni mazkur palament so‘roviga javob sifatida Qonunchilik palatasiga maʼlumot taqdim etilgan.
Mudofaa va xavfsizlik masalalari qo‘mitai raisi Erkin Solihovning aytishicha, taqdim etilgan maʼlumotda asosiy eʼtibor aynan parlament so‘rovida ko‘tarilgan masalalarga qaratilmagan.
“Buning natijasida so‘rovda qayd etilgan kamchiliklar, sohadagi dolzarb masalalar yuzasidan qo‘yilgan savollarga yetarli va to‘liq javob berilmaganligini ko‘rsatdi.
Kuni kecha o‘tkazilgan fraksiyalar yig‘ilishlarida ham parlament so‘roviga berilgan javob atroflicha muhokama qilindi hamda taqdim etilgan maʼlumotlar yetarli darajada tushuntirish berilmagani taʼkidlab o‘tildi.
Yuqoridagilardan kelib chiqib, Qonunchilik palatasining majlisida Bosh vazir o‘rinbosari mazkur parlament so‘rovini qayta ko‘rib chiqib, unda qo‘yilgan har bir masala yuzasidan joriy yilning 1-dekabriga qadar to‘liq va asoslantirilgan javob berish yuzasidan tegishli qaror qabul qilindi”, — dedi Erkin Solihov.
Majlisda deputatlar bosh vazir o‘rinbosaridan qo‘shimcha javob olish uchun tayyorlangan qarorni maʼqulladi.
Izoh (0)